الماتى اكىمىنىڭ ورىنباسارى شاڭىراعىندا تورتەم دۇنيەگە كەلگەن جانۇيانى قۇتتىقتاپ، سىيلىق سىيلادى - فوتو

الماتى پەريناتالدىق ورتالىعىندا 5- تامىزدا تورتەم دۇنيەگە كەلگەنىن كەشە حابارلاعان بولاتىنبىز.

ايتا كەتۋ كەرەك، الماتى تۇرعىنى بايان مەن قاناتتىڭ وتباسىندا 3 ۇل تاربيەلەنىپ جاتىر. ەندى ولاردىڭ ارتىنان تاعى ءبىر ەر بالا، ءۇش قىز بالا دۇنيەگە كەلدى.

مامانداردىڭ ايتۋىنشا، قازىر سابيلەردىڭ دەنساۋلىعى جاقسى، ولار بولىمشەگە اۋىستىرىلدى.

سونداي-اق، 21- شىلدەدە قالالىق پەريناتالدىق ورتالىقتا بيىل وسىمەن ءتورتىنشى رەت ۇشەم دۇنيەگە كەلدى. ۇشەمنىڭ اتا-اناسى تولعاناي مەن باۋىرجاننىڭ ۇيىندە 2 جاسار قىزى بار.

وتباسى ەندى تاعى ءۇش سابيمەن تولىعىپ، كوپبالالى وتباسى قاتارىنا قوسىلدى.

«كۇندەلىكتى تورتەم تۋا بەرمەيدى. 5 جىل بۇرىن انا مەن بالا ينستيتۋتىندا تورتەم تۋعان. ءبىراق، ول كەزدە جاساندى ۇرىقتاندىرۋ جولىمەن بولاتىن. وسى جولى فيزيولوگيالىق جاعدايمەن بولىپ وتىر. قازىر بالالار ينتەنسيۆتى پالاتادان شىقتى. قازاقتىڭ سانى ۇلعايىپ جاتقانىنا قۋانىشتىمىز. بايان بىردەن «التىن القا» بەلگىسىن الادى. بالالاردىڭ دەنى ساۋ بولسىن. قازاقستاندا مەديتسينانىڭ جەتىستىگىنە قاراي، ادامداردىڭ ءال اۋقاتىنىڭ جاقسارعانىنا قاراي ۇشەم دە كوبەيىپ كەلە جاتىر»، - دەدى زاۋرەش امانجولوۆا.

ونىڭ ايتۋىنشا، الماتى بويىنشا جىلىنا 42-43 مىڭ بالا دۇنيەگە كەلەدى. ءار 9- پەرزەنت الماتىدا تۋادى. ءار 8- قازاقستاندىق الماتىدا ەمدەلەدى.

ەندى جاس انالارعا 2 مەدبيكەدەن بولىنەدى. ال، پاتەر ماسەلەسى وتباسىلاردىڭ ماتەريالدىق جاعدايى تەكسەرىلىپ بارىپ قاراستىرىلىماق.

«ەگەر، بۇل وتباسىلار شىن مۇقتاج بولسا، الماتى قالاسىنا ەسەپكە قويىپ، 7-8 اي اراسىندا جەدەلدەتىلگەن تۇردە پاتەر بەرىلەدى»، - دەدى اكىمنىڭ ورىنباسارى.

تورتەمنىڭ اناسى بالالاردى 9 اي بويى كوتەرىپ جەتكىزۋ قيىن بولعانىن جەتكىزدى.

«جۇكتىلىگىم قيىن بولدى. ءتورت بالانى وسىنشاما اي بويى كوتەرۋ دەگەن وڭاي ەمەس. قۇدايدىڭ قۇدىرەتىمەن وسى كۇنگە امان جەتتىك. تورتەم ەكەنىن 11 اپتاسىندا بىلدىك. مەنىڭ تۇقىمىمدا ەگىز بار. اعامدا ەگىز بالا، اپكەمدە ەگىز بالا بار. جولداسىم ەكەۋمىز قۋاندىق. ءۇش ۇلىم بار: 11 دە، 7 دە جانە 5 جاستا. مەن 35 كە تولدىم. مەن ءوزىم ك ي م ە پ- تە ماگيستراتۋرادا وقيمىن. 4 ەۋىن اجىراتىپ جاتىرمىز. ۇلكەنى ۇل 2,3 كەلى، ودان كەيىن ەگىز قىز 2,2 كەلى، 1,871 كەلى سالماقپەن، ەڭ كەنجەسى 1,3 كەلى سالماقپەن تۋدى. جەر ۇيدە تۇرامىز. ءوز جانۇيامىزعا كۆادراتۋرامىز جەتەتىن. ەندى بىردەن 4 بالا تۋعان سوڭ، كىشكەنە ۇلكەيتۋ كەرەك. سىيمايتىن سياقتىمىز. جولداسىم ەرسەيىتوۆ قانات جەكە كاسىپكەرلىكپەن اينالىسادى»، - دەدى 35 جاستاعى بايان ابدۋللينا.

21- شىلدەدە دۇنيە ەسىگىن اشقان ۇشەمدەر دە قازىر كۇن ساناپ سالماق قوسۋدا. بۇگىن ولار پەرزەنتحانادان شىقتى.

«ۇيدە ۇلكەن قىزىم - ايشا بار. ودان كەيىن مىنە، ءىنجۋ، ىڭكار، اقنۇر دەگەن ءۇش قىزىم قاتار دۇنيەگە كەلدى. ءتورت قۇبىلام تۇگەل دەپ سانايمىن. اللاعا مىڭ شۇكىر»، - دەدى ۇشەمنىڭ اكەسى 28 جاستاعى ساتىبالديەۆ باۋىرجان.

«ەڭ باستىسى تورتەمنىڭ امان-ەسەن تۋعانى ءۇشىن الاڭدادىق. كوپ كىندىكتى ەگىز بولعان سوڭ. ءبىراق، مەديتسينالىق كوماندانىڭ بىلىكتى جۇمىسىنىڭ ارقاسىندا وتادان كەيىن دە اسقىنۋلار بولمادى. انالارى دا، بالالارى دا وزدەرىن جاقسى سەزىنىپ جاتىر. وسىدان 5 جىل بۇرىن الماتىدا تورتەم تۋعان. ءبىراق ول جاساندى ۇرىقتاندىرۋمەن بولعان. سوڭعى سەگىز ايدا 4 ۇشەم دۇنيەگە كەلدى»، - دەدى الماتى پەريناتالدىق ورتالىعىنىڭ ديرەكتورى ەلميرا جاقاشيەۆا.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى