بۇرىنعى پرەمەر س. احمەتوۆكە وتباسىلىق بيزنەس مۇددەلەرىن كوزدەدى دەگەن ايىپ تاعىلۋدا - فوتو
تەرگەۋ نۇسقاسى بويىنشا س. احمەتوۆ 2010-جىلدان باستاپ 2014-جىل ارالىعى كەزەڭىندە اۋىر جانە اسا اۋىر سىبايلاس جەمقورلىق قىلمىستارىن جاسادى.
س. احمەتوۆ وتباسىلىق بيزنەس مۇددەلەرىن كوزدەگەنى جانە تۋىستارى مەن تانىستارى ارقىلى كاسىپكەرلىك جۇرگىزگەنى ءۇشىن ايىپتالدى.
«2011-جىلى اقپاندا مەملەكەتتىك باعدارلامانى ىسكە اسىرۋعا جەرگىلىكتى بيۋدجەتتەن 100 ميلليون تەڭگە ءبولىندى. س. ن. احمەتوۆ ءوز قولىنداعى اقپاراتتى، سونداي-اق ءوز قىزمەتتىك وكىلەتتىگىن اسىرا پايدالانىپ، وتباسىلىق بيزنەس ءۇشىن پايدا تابۋ مەن ارتىقشىلىقتار الۋ قىلمىستىق نيەتىن ىسكە اسىرعان، ول مەتالل بۇيىمدارىن ىستىق مىرىشتاۋ قىزمەتىن كورسەتەتىن «بولات مىرىش» ج ش س (سەنىمدى تۇلعا ارقىلى تەڭ قۇرىلتايشى د. سىرىم ونىڭ ۇلى احمەتوۆ د. س. باسشىسى - ونىڭ سەنىمدى تۇلعاسى - ر. ك. ءاجىمۇراتوۆ، ديرەكتوردىڭ ورىنباسارى - ونىڭ باۋىرى ب. ن. احمەتوۆ) مەن ولارمەن ۇلەستەس «بولات مىرىش» ساۋدا ءۇيى» ج ش س كاسىپورنىن (ر. ك ءاجىمۇراتوۆ جالعىز قۇرىلتايشىسى) قاراعاندى قالاسى كوشەلەرىن سىرتتان جارىقتاندىرۋ تىرەگىن اۋىستىرۋ بويىنشا مەردىگەر رەتىندە تارتقان»، - دەلىنگەن حابارلامادا.
وسىلايشا وسىنداي جۇمىس جۇرگىزەتىن كاسىپورىندار ءۇشىن كەمسىتۋشىلىك جاعداي قالىپتاستىرعانى اتاپ وتىلەدى. مەملەكەتكە كەلتىرىلگەن جالپى شىعىن 202 ميلليون تەڭگەنى قۇرايدى.
كەلەسى ەپيزود قاراعاندىدا «كولىك-لوگيستيكالىق كەشەنى» ج ش س قۇرىلىسىنا جەر ۋچاسكەسىن بەرۋگە بايلانىستى، س. احمەتوۆ مەملەكەتتىك قاراجات ەسەبىنەن ىلەسپە ينفراقۇرىلىممەن جەكە بيزنەسىن قۇرعان. بۇل رەتتە جوبا «ب ج ك-2020» باعدارلاماسى بويىنشا قولداۋ الدى. ايىپتا سەنىمدى تۇلعا ارقىلى ينۆەستور رەتىندە ۇلى بريتانياداعى شەتەلدىك كومپانيا تىركەلگەنى كورسەتىلگەن.
سوتتا ءىستىڭ 21 فيگۋرانتىنا قاتىستى ايىپتاۋ اكتىسى جاريالاندى. ءۇشىنشى كۇنى كولەمدى قۇجاتتى ءۇش پروكۋرور ديار ءادىلوۆ، گالينا كەردەكايەۆا جانە راۋان توبىقوۆ كەزەكپەن وقيتىن بولادى. ايىپتى جاريالاۋ اپتا سوڭىندا اياقتالادى دەپ كۇتىلۋدە، سودان كەيىن سوت باسقا تالقىلاۋ راسىمدەرىنە كىرىسەدى.
ەسكە سالساق، س. احمەتوۆكە جانە باسقا دا فيگۋرانتتارعا قاتىستى قىلمىستىق ءىس قاراعاندى وبلىسى قىلمىستىق ىستەر جونىندەگى مامانداندىرىلعان اۋدانارالىق سوتقا 2015-جىلعى 13- شىلدەدە تۇسكەن. 14- شىلدەدە ءار سوتتالۋشىعا ستاتيستيكالىق كارتوچكا تىركەلدى. قىلمىستىق ءىس اۆتوماتتى تۇردە سۋديا يسلامحان ەسەنبايەۆقا بەرىلدى.
سىبايلاس جەمقورلىق ءىسى بويىنشا بارلىعى 21 ادام تەرگەلۋدە. ولارعا قىزمەت بابىن اسىرا پايدالاندى، بيۋدجەت قاراجاتىن ۇرلادى جانە كاسىپكەرلىك قىزمەتكە زاڭسىز ارالاستى دەگەن ايىپتار تاعىلعان. س. احمەتوۆ سونداي-اق اسا ءىرى كولەمدە پارا الۋعا ايىپتالۋدا. قىلمىستىق ءىس ماتەريالدارى 300 تومنان اسادى.
باستى سوت تالقىلاۋى 10- تامىزدا باستالدى.
