سەرىك احمەتوۆ تۋرالى جالعان اقپارات تاراتقانى ءۇشىن ايىپتالۋشىعا سوت ۇكىمى شىقتى
ەسكە سالا كەتەيىك، بيىلعى جىلى قىستا ت. رىسقۇلوۆ اۋدانىنىڭ كوگەرشىن اۋىلىنىڭ 25 جاسار تۇرعىنى جاندوس بايشەمىروۆ «ۆكونتاكتە» الەۋمەتتىك جەلىسىنىڭ موبيلدى نۇسقاسى ارقىلى جالعان اككاۋنتتان (ۇيالى تەلەفون ارقىلى) «بۇگىن س. احمەتوۆتىڭ مۇردەسى تابىلدى» دەگەن تاقىرىپپەن ادەيى جالعان اقپارات تاراتقان. ونىڭ مازمۇنى بىلاي بولعان: «قازىر عانا اقوردانىڭ باسپا ءسوز قىزمەتى بۇگىن استانا ۋاقىتى بويىنشا ساعات 12:45 تە بۇرىنعى قورعانىس ءمينيسترى س. احمەتوۆتىڭ قاراعاندىداعى ءوز ۇيىنەن دەنەسى تابىلعانى تۋرالى حابارلادى...».
باستى سوت وتىرىسىندا ق ر قىلمىستىق كودەكسىنىڭ 274- بابىنىڭ 2 ب. 3 ت. (اقپاراتتىق-كوممۋنيكاتسيالىق جەلى قۇرالدارىن پايدالانۋمەن ادەيى جالعان اقپارات تاراتۋ) قاراستىرىلعان قىلمىستى جاسادى دەگەن ايىپپەن سوت الدىندا جاۋاپ بەرىپ، ءوز كىناسىن تولىق مويىندادى. سوتتالۋشى ج. بايشەمىروۆتىڭ كىناسى باستى سوت وتىرىسى بارىسىندا زەرتتەلگەن دالەلدەرمەن راستالدى.
جازا ءتۇرى مەن كولەمىن انىقتاۋدا سوت ق ر ق ك 52- بابىنىڭ نەگىزىندە جاسالعان قىلمىستىڭ سيپاتى مەن قوعامعا قاۋىپتىلىك دارەجەسىن، كىنالى تۇلعانىڭ جەكە باسىن، ونىڭ ىشىندە قىلمىستى جاساعانعا دەيىنگى جانە ودان كەيىنگى مىنەز-قۇلقىن، جاۋاپكەرشىلىك پەن جازانى جەڭىلدەتەتىن جانە اۋىرلاتاتىن جاعدايلاردى، سونداي-اق بەلگىلەنگەن جازانىڭ سوتتالۋشىنىڭ تۇزەلۋىنە جانە ونىڭ ومىرىنە ىقپالىن ەسكەردى.
سوتتالۋشىنىڭ جەكە باسىن جانە كەلتىرىلگەن زياننىڭ بولماۋىن ەسكەرۋمەن قىلمىس ورتاشا دارەجەدەگى اۋىرلىق ساناتىنا جاتقىزىلدى.
ت. رىسقۇلوۆ اتىنداعى اۋداننىڭ سوتى جاندوس بايشەمىروۆتى ق ر ق ك 274 ب. 2 ب. 3 ت. قاراستىرىلعان قىلمىستىق قۇقىق بۇزۋشىلىقتى جاساۋدا كىنالى دەپ تاۋىپ، وعان 1982000 تەڭگە سوماسىندا، ياعني 100 ايلىق ەسەپتىك كورسەتكىش كولەمىندە ايىپپۇل سالۋ جازاسىن تاعايىندادى.
«قاماۋدا ۇستاۋ» بۇلتارتپاۋ شاراسى وزگەرتىلدى. سوتتالۋشى سوت زالىنان بوساتىلدى.
ۇكىم زاڭدى كۇشىنە ەنگەن جوق.
