قازاقستاندا سوت ورگاندارىنا شاعىم بەرۋ وڭتايلاندىرىلدى
قالالىق سوت كەڭسەسى جەتەكشىسىنىڭ ورىنباسارى ارمان يبراگيموۆتىڭ ايتۋىنشا، سايت قىزمەتىن پايدالانعىسى كەلگەن تۇلعانىڭ ەلەكتروندى ساندىق قولتاڭباسى بولۋى قاجەت. سوت كابينەتىنە تىركەلگەننەن كەيىن پايدالانۋشىعا تالاپ ارىزداردى، بۇيرىقتاردى، ەرەكشە تالاپ ارىزداعى سوت اكتىلەرىن، قۇجاتتاردى بەرۋ، تولەم چەكتەرىن قاراۋ قىزمەتتەرى قولجەتىمدى بولادى.
«سىزدەرگە ەشقايدا بارۋدىڭ قاجەتى جوق. ۇيدە كومپيۋتەردە وتىرىپ-اق ءسىز كەز كەلگەن ۋاقىتتا وسى پورتال ارقىلى تالاپ ارىز بەرە الاسىز. ياعني، تالاپ ارىز بەرۋ ايتارلىقتاي جەڭىلدەيدى»، - دەدى ا. يبراگيموۆ.
سوت باسپا ءسوز قىزمەتىنىڭ تۇسىندىرۋىنشە، سەرۆيس كومەگىمەن سوت ورگاندارىنا ەلەكتروندى پوشتا ارقىلى جۇگىنۋگە دە مۇمكىندىك بار. بۇل رەتتە ازاماتتار ءوز حاتىنىڭ سوت ورگاندارىنا جەتكەنىنە تولىق سەنىمدى بولادى.
اۆتور: مارلان جيەمباي
