تۇزقالا بولاشاقتا كەشەندى شيپاجايعا اينالۋى مۇمكىن

وسى ءىستى قولعا العاندار ەمدەۋ- ساۋىقتىرۋ سالاسىنا كوپ كوڭىل بولمەك. اتاقتى انگە ارقاۋ بولعان مارالدى كولى پاۆلودار وبلىسىنىڭ شارباقتى اۋدانىنا قارايدى.

ال مارالدى سىندى اششى كولدەر وبلىس اۋماعىندا جەتىپ ارتىلادى. ولاردىڭ كەيبىرى وبلىس تۇرعىندارىنىڭ جاز مەزگىلىندە دەمالاتىن سۇيىكتى ورنىنا اينالعان. حالىق اراسىندا بۇل ءوڭىر تۇزقالا اتالىپ كەتكەن. كەزىندە كولدەن تۇز الىنىپ، قالا تىركەسى تاۋ-تاۋ بولىپ ۇيىلگەن تۇزعا قاراپ قويىلعانعا ۇقسايدى. بۇگىنگى كورىنىسى باسقا.

تۇزقالانىڭ جاعاسى تۋريستەرگە تولعان.

عاليا قابانبايەۆا، دەمالۋشى (اقسۋ قالاسى):

- قىس كەزىندەگى ءتۇرلى اۋرۋدان وسىلاي ساقتانامىز. بۇل جەردە تۇزدى سۋى بار، ەمدىك بالشىعى دا بار. وسىنىڭ ءبارىن ەم قىلىپ، اسەر الىپ، بويىمىزعا كۇش قۋات جيناپ، جىلدا دەمالامىز.

ءبىر قاراعان ادامعا مۇندا تۇنىپ تۇرعان تابيعات جوق سياقتى كورىنەدى. تۇرعىندار تازا اۋامەن تىنىستاپ، سۋعا شومىلىپ راقات الادى. بالشىعىنا قىزىعىپ كەلەتىندەر كوپ. ەرتەرەكتە كول سۋىن جەرگىلىكتى حالىق تەك ەمدىك ماقساتتا پايدالانعان دەسەدى. ەرمۇحامەت قوجاقانوۆ وتباسىمەن جاز مەزگىلىندە وسىندا بىرنەشە رەت كەلىپ دەمالادى. تابيعاتتىڭ ءوزى تارتۋ ەتىپ وتىرعان تاماشا سىيدى نەگە پايدالانباسقا؟ باردى باعالاي بىلگەندە عانا ەلدەگى تۋريزم العا باسادى دەگەن پىكىردە ول.

ەرمۇحامەت قوجاقانوۆ، دەمالۋشى (استانا قالاسى):

- شەتەلدە ءبارى بار، ال قازاقستاندا تۇك جوق دەگەن قاتە پىكىردەمىز. قازاقستاندا ءبارى بار. سىرت كوز سىنشى. رەسەيدەن كەلگەن مەيمانداردىڭ ءبىرى بۇرىن سوڭدى مۇنداي كەرەمەتتى كورمەدىم دەپ تاڭداي قاقتى.

ماريا فاتسكايا، دەمالۋشى (رەسەي):

- مەن بۇل كولدىڭ ەرەكشەلىگىنە تاڭدانىپ تۇرمىن. عاجايىپ مەكەن، بۇل جەردىڭ اۋاسى تازا، جاعاجايداعى قۇمىنىڭ ءوزى بولەك. سۋى دا، بالشىعى دا شيپالى ەكەن. دەمالىس كوڭىلىمنەن شىقتى.

ەمدەۋ- ساۋىقتىرۋ تۋريزمىن دامىتۋعا وبلىستا ءالى يگەرىلمەگەن باي رەسۋرستار بار. مويىلدى شيپاجايى سياقتى مارالدى، تۇزقالا،  قىزىلتۋ كولدەرىن ەمدەۋ- ساۋىقتىرۋ ماقساتىندا پايدالانۋعا بولادى. ول ءۇشىن سۋمەن بالشىقتىڭ قۇرامىن زەرتتەۋ كەرەك. تۋريزمدى دامىتۋعا ارنالعان كەشەندى ءىس- جوسپارعا ناقتى وسى ماسەلە ەنگىزىلگەن.

سالتانات نۇرماعامبەتوۆا، وبلىستىق ساۋدا جانە كاسىپكەرلىك باسقارماسى تۋريزمدى دامىتۋ ءبولىمىنىڭ جەتەكشىسى:

- بۇل كولدەر ءالى تولىق زەرتتەلمەگەن. ولاردىڭ سۋىمەن بالشىعىنىڭ باكتەريولوگيالىق قۇرامىن زەرتتەيتىن جوبانى باستايمىز. كەلەشەكتە شيپاجايلار سالۋ جوسپارىمىز دا بار.

جىل سايىن پاۆلودار وبلىسىنا شامامەن 230 مىڭداي تۋريست كەلەدى. ولاردىڭ 130 مىڭنان استامى باياناۋىل اۋدانىنداعى ايگىلى جاسىباي، سابىندىكول، تورايعىر كولدەرىندە دەمالادى. ال ءبىز ايتىپ وتىرعان «تۇزقالا» دەمالىس ورنى كەلەشەكتە تۇرعىنداردى جىل ون ەكى اي قابىلدايتىن كەشەندى شيپاجايعا اينالۋى دا عاجاپ ەمەس.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى