قازاقتان شىققان تۇڭعىش وليمپيادا چەمپيونى تۋرالى فيلم ءتۇسىرىلدى
كورسەتىلىمگە فيلمنىڭ رەجيسسەرى، پروديۋسەرى، اكتەرلەر، سونىمەن قاتار سپورتشىلار مەن قالا تۇرعىندارى قاتىستى.
كارتينادا جاقسىلىق ۇشكەمپىروۆتىڭ تۋعان ساتىنەن باستاپ، بۇگىنگى كۇنگە دەيىنگى ءومىرى بەينەلەنگەن.
فيلمدى ءتۇسىرۋ بارىسىندا قازاقستان جانە رەسەيدىڭ مۇراعاتتارىنان تابىلعان دەرەكتەر قولدانىلىپتى.
سونىمەن قاتار فيلمنىڭ تولىققاندى بولۋىنا جاقسىلىق ۇشكەمپىروۆتىڭ جاتتىقتىرۋشىلارى روم يلماتوۆ، ۆلاديمير ۋگرەنينوۆ جانە ۆاديم پساريەۆتەر، سونداي-اق دوستارى، وتباسى جانە سپورت جانە ساياسي قايراتكەرلەر كومەكتەسكەن.
«وسىنداي ۇلى سپورتشىنى مىسال رەتىندە الا وتىرىپ، جاس ۇرپاققا ۇلگى ەتكىمىز كەلەدى. العا ماقسات قويىپ، وعان ۇمتىلۋ كەرەك. ونىڭ ومىرىندە كوپتەگەن قيىندىقتار بولدى، ول سپورتپەن تەك 20 جاسىندا عانا اينالىسا باستاعان، سوعان قاراماستان 29 جاسىندا وليمپيادا چەمپيونى بولدى»، - دەدى فيلم رەجيسسەرى توقتار قارساقبايەۆ.
