سەرىك احمەتوۆ ءىسى: سۋدياعا نارازىلىق ءبىلدىرۋ جونىندەگى ءوتىنىش قابىلدانبادى
ايىپتالۋشى ورىندىعىندا وبلىستىڭ ەكس-اكىمى باۋىرجان ابدىشيەۆ، قاراعاندىنىڭ بۇرىنعى اكىمى مەيرام سماعۇلوۆ پەن ءبىرقاتار شەنەۋنىك وتىر، ەلىمىزدىڭ بۇرىنعى پرەمەر-ءمينيسترى سەرىك احمەتوۆ تە سول جەردە.
بۇگىن سوت وتىرىسى بارىسىندا سوتتالۋشىلاردىڭ ءبىرى، بۇرىن قالالىق تۇرعىن ءۇي-كوممۋنالدىق شارۋاشىلىعى ءبولىمىن باسقارعان ايدوس جاكەنوۆتىڭ ادۆوكاتى سۋديا يسلامحان ەسەنبايەۆقا نارازىلىعىن ءبىلدىردى.
«سۋديا بۇل ىسكە قاتىسا المايدى، سەبەبى 28- شىلدەدە ءبىز ق پ ك (ق ر قىلمىستىق-پروتسەسسۋالدىق كودەكسى - اۆت.) زاڭ بۇزۋشىلىعىنا قاتىستى ارىز تۇسىرگەن بولاتىنبىز. سۋديا ونى قاناعاتتاندىرمادى جانە شاعىم تۇسىرۋگە 15 كۇن بەرۋ تۋرالى قاۋلى شىعاردى. 6- تامىزدا اپەللياتسيالىق شاعىم بەرىلدى، ال 10- تامىزعا سوتتىڭ باستى وتىرىسى تاعايىندالعان. شاعىم ءتۇسىرۋ مەرزىمى اياقتالماعاندىقتان سۋديا ەسەنبايەۆ ءىستى قاراي المايدى»، - دەدى مەيرام شايمەردەنوۆ. سونىمەن قاتار، ول يسلامحان ەسەنبايەۆ جاكەنوۆتى قورعاۋعا قاتىستى قۇقىق بۇزدى دەپ مالىمدەدى.
شاعىمدى وزگە سۋديا - تولەگەن تاڭسىقپايەۆ قارادى جانە مىناداي قاۋلى شىعاردى: «ادۆوكات شايمەردەنوۆتىڭ دالەلدەرى سۋدياعا نارازىلىق بىلدىرۋگە نەگىز بولا المايدى»، - وسىدان كەيىن سوت وتىرىسى جالعاستى. وسىلايشا، بۇرىن تاعايىندالعان سۋديا يسلامحان ەسەنبايەۆ بۇل ءىستى جۇرگىزەتىن بولدى.
ايتا كەتەيىك، بۇعان دەيىن سەرىك احمەتوۆ پەن ءىستىڭ وزگە فيگۋرانتتارىنىڭ ادۆوكاتتارى ىستە قىلمىس قۇرامىنىڭ جانە ءوز قورعاۋىنداعىلارعا تاعىلىپ وتىرعان ايىپتىڭ دالەلى جوق ەكەنىن مالىمدەدى. زاڭگەرلەر تاعىلعان ايىپتاردان شىعىن كەلتىرۋ جانە كەپىلدەندىرىلگەن مۇلىكتىڭ قۇنىن ارتتىرۋ ەپيزودتارىن الىپ تاستاۋدى سۇرادى. قورعاۋشى تاراپتىڭ ويىنشا، قازىر «توپارسكيە تەپليتسى» ج ش س- نىڭ مۇلكى - 2 ميلليارد تەڭگەگە، ال «قازاگرو» مۇلكى 1,1 ميلليارد تەڭگەگە باعالانىپ وتىر. سوندىقتان، قورعاۋشى تاراپ مەملەكەتكە شىعىن كەلمەگەندىكتەن، قىلمىس قۇرامى دا بولعان جوق دەدى.
سونىمەن قاتار، بۇعان دەيىنگى سوت وتىرىسىندا سەرىك احمەتوۆتىڭ اعاسى كەلتىرىلگەن شىعىننىڭ وتەمى رەتىندە مەملەكەتكە 430 ميلليون تەڭگەنى (2,29 ميلليون دوللار) قايتاردى. دەگەنمەن، احمەتوۆتىڭ ءوزى دە، ءىس بويىنشا كۋاگەر بولعان اعاسى دا مەملەكەتكە شىعىن كەلگەنىن مويىندامادى.
ەسكە سالا كەتەيىك، قازاقستاننىڭ بۇرىنعى ءمينيسترى سەرىك احمەتوۆكە جەمقورلىق ماندەگى التى قىلمىس بويىنشا رەسمي تۇردە ايىپ تاعىلعان بولاتىن، ولاردىڭ قاتارىندا اسا ءىرى كولەمدە پارا الدى (تەرگەۋدىڭ تۇجىرىمىنشا، 2 ميلليون 400 مىڭ دوللار - اۆتور.)، اسا ءىرى كولەمدە بيۋدجەت قارجىسىن جىمقىردى، لاۋازىمىن اسىرا پايدالاندى جانە كاسىپكەرلىك قىزمەتكە زاڭسىز ارالاستى دەگەن ايىپتار بار.
سەرىك احمەتوۆ 2014-جىلى قاراشادا قاماۋعا الىندى. وسىدان كەيىن قاماۋ مەرزىمى ۇزارتىلدى.
