دزيۋدو: موڭعول بالۋانى وڭتۇستىكتىڭ نامىسىن قورعايدى
قۇربىلارى قىسقاشا وتگون دەپ اتاپ كەتكەن دزيۋدوشىنىڭ جاسى - 22 دە. موڭعوليا تۋماسى. 8 جىلدان بەرى تاتامي تورىندە كۇرەسىپ كەلەدى.
ماسكەۋدە وتكەن «گراند سلەم» تۋرنيرىندە كۇمىس مەدال، ءابۋ-دابيدەگى «گراند سلەمدە» قولا، باكۋدەگى حالىقارالىق جارىستا ەكىنشى ورىن العان. ال استانادا جالاۋى كوتەرىلگەن «گران پري» تۋرنيرىندە باس جۇلدە، تاشكەنتتە - ءۇشىنشى، چەحياداعى الەم كۋبوگى ءۇشىن تالاستا كۇمىس مەدال ەنشىلەگەن. ۇلان-باتىرداعى «گران پري» سىناعىندا ءبىر قولا، ەكى كۇمىس مەدال جەڭىپ العان. سونداي-اق، قىتاي جانە ۆەنگريادا ءۇشىنشى ورىننان كورىنگەن.
«الەمدىك تاجىريبە كورسەتكەندەي، شەتەلدىڭ ەپتى سپورتشىلارىنىڭ پايداسى وراسان زور. ماسەلەن، اسپان استى ەلىنەن اۋىر اتلەتشىلەر قازاق جەرىنە كەلىپ، وليمپيادا ويىندارىندا توپتى جارعانى ءبىزدىڭ ءبىرقاتار سپورتشىلارعا ۇلگى بولدى. بۇگىندە ولاردىڭ ءىزىن باسىپ، ەپتىلىك تانىتىپ جاتقان جەرگىلىكتى جاستار پايدا بولا باستادى. دزيۋدودان دا ەرلەر قۇراماسىنان كۇتەر ءۇمىت زور. ال ايەلدەر كومانداسى اقساپ تۇرعانى راس. رەسپۋبليكادا باسەكەلەستىك بولماي تۇر. سول سەبەپتى دە موڭعوليالىق بالۋاندى شاقىردىق. وتگون - ءوز ەلىندە ەكىنشى ءنومىرلى دزيۋدوشى قىز. جەتكەن جەتىستىكتەرى دە جاقسى. باستاپقىدا ازاماتتىق الۋدا ءبىر قاتار قيىندىقتار بولىپ، بالۋان قاجەتتى جارىستارعا شىعا المادى. دەگەنمەن، الداعى استانادا وتەتىن الەم چەمپيوناتىنان ءۇمىتىمىز بار. باستى ماقسات - ريو وليمپياداسىنا جولداما جەڭىپ الۋ»، دەيدى و ق و دەنە تاربيەسى جانە سپورت باسقارماسىنىڭ باسشىسى الىبەك نۇرتايەۆ.
وتگوننىڭ وڭتۇستىكتىڭ تاتاميىنە شىققالى الەكساندرا پودريادوۆاعا باسەكەلەستىك پايدا بولدى. وسىعان دەيىن 48 كەلى سالماقتا ءبىرىنشى ءنومىرلى سپورتشى بولىپ كەلگەن جەرلەسىمىز ەندى ريو وليمپياداسىنا جولداما الۋ ءۇشىن تىنباي ەڭبەكتەنىپ، وتگوننان ەپتىلەۋ ەكەنىن بايقاتۋى قاجەت.
«وتگوننىڭ كەلۋىمەن باسەكەلەستىك پايدا بولىپ، مەن ءۇشىن دە ونىڭ پايداسى وراسان زور بولۋدا. ءبىرقاتار جارىستارعا بارىپ، جۇلدەلى دە بولدىم. ءار جاتتىعۋدا وتگونمەن ءبىر جۇپ بولىپ كۇرەسەمىز. تاتامي تورىندە قارسىلاس بولساق تا، سپورت زالدان تىس كەزدە جاقىن قۇربىلار بولا الدىق. مىنەزى اشىق قىز ەكەن. وڭتۇستىك كۇرەسىنە جاقسى ناتيجەلەر الىپ كەلەتىنىنە سەنەمىن»، - دەيدى الەكساندرا پودريادوۆا.
الەكساندرا بۇگىندە الەمدىك رەيتينگتە العاشقى 30 پالۋاننىڭ اراسىندا. وليمپياداعا جولداما جەڭىپ الۋ ءۇشىن كەم دەگەندە 14-ورىنعا تۇراقتاۋى قاجەت. ەندىگى ماقسات استانادا وتەتىن الەم چەمپيوناتىندا ۇزدىكتەر قاتارىنان كورىنۋ بولىپ وتىر. ەلورداعا ساشامەن بىرگە وتگون دا بارادى.
