كوكشەتاۋ تۇرعىنى بالاسىن سۇندەتتەيمىن دەپ، ءولتىرىپ الا جازدادى

قانسىراعان بالانى جەدەل جاردەم دەرەۋ اۋرۋحاناعا جەتكىزدى، دەپ حابارلايدى Bnews.kz.

بالالار اۋرۋحاناسىنىڭ باس دارىگەرى قايىر ءابدىراحمانوۆتىڭ ايتۋىنشا، قازىر بالانىڭ جاعدايى ءبىر قالىپتى.

«كوكشەتاۋ قالاسى تەمىربەكوۆ كوشەسى 140-ۇيدە تۇراتىن 2008 -جىلى 30 -شىلدەدە تۋعان ومارحان قۇتىمبەتتى جەدەل جاردەم كولىگىمەن تاڭعى 5 تە اۋرۋحاناعا جەتكىزدىك. ومارحاننىڭ اكەسى بالانى ءوز ۇيىندە سۇندەتتەمەك بولعان. توقتاماي اققان قاندى كورگەندە اكەنىڭ ەسى شىعىپ، ابدىراپ قالعان. ءسويتىپ، دەرەۋ جەدەل جاردەمگە حابارلاسقان»، - دەيدى ق. ءابدىراحمانوۆ.

ول مۇنداي جاعدايدى ومىرىندە العاش رەت كەزدەستىرىپ وتىرعانىن ايتادى.

«حيرۋرگ كەسىلگەن جەردى تىگىپ، قاندى توقتاتتى. قازىر بالانى امبۋلاتوريالىق ەم قابىلداۋعا جىبەردىك، ونىڭ جاعدايى ءبىر قالىپتى. دەگەنمەن، ءبىز بۇل وقيعا جونىندە پوليتسەيلەرگە حابارلادىق. سونىمەن بىرگە، دەنساۋلىق ساقتاۋ باسقارماسى مەن بالالاردىڭ قۇقىقتارىن قورعاۋ قىزمەتىنە دە حابار بەرەمىز. ەگەر بالاعا بىردەڭە بولسا نە بولار ەدى، بۇل ىسپەن قۇزىرلى مەكەمەلەر اينالىسۋى كەرەك»، - دەيدى دارىگەر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى