الماتىداعى «راحات» فابريكاسىنىڭ ونىمدەرى ۇزدىك تاۋار اتاندى

وسىمەن توعىزىنشى رەت وتكىزىلىپ وتىرعان ءدۇبىرلى بايقاۋعا قاتىسۋعا 102 كومپانيا ءوتىنىم بەرىپتى. بايقاۋ بارىسىندا كورمە ۇيىمداستىرىلىپ، 90 نان استام كاسىپورىن ءوز ونىمدەرىن تانىستىردى.

الماتى قالاسىنىڭ اكىمى احمەتجان ەسىموۆ پەن «اتامەكەن» ق ر ۇ ك پ باسقارما ءتوراعاسىنىڭ ورىنباسارى گۇلنار قۇربانبايەۆا كورمەنى تاماشالاپ، جەڭىمپاز كاسىپورىندارعا سىي- سياپاتىن تابىستادى. بايقاۋدى قالا اكىمدىگى مەن «اتامەكەن» ۇلتتىق كاسىپكەرلەر پالاتاسى بىرىگىپ ۇيىمداستىرعان بولاتىن.

- الماتى - ەلىمىزدىڭ ەكونوميكالىق ورتالىعى. داعدارىسقا قاراماستان، قالامىزدىڭ بىلتىرعى جالپى ايماقتىق ءونىمى 7,1 پايىزعا جەتتى. بۇل كورسەتكىش قالا بويىنشا 8 تريلليون تەڭگەنى قۇرادى. مۇنى قازاقستانداعى ەڭ ۇزدىك كورسەتكىش دەۋگە بولادى. وسى كورسەتكىشتى ۇستاپ قالۋ - ءبىزدىڭ باستى ماقساتىمىز. بۇگىن كورمەنى ارالاپ كورىپ، كاسىپورىندارىمىزدىڭ باسەكەگە قابىلەتتى ءونىم شىعارىپ جاتقانىنا كوزىم جەتتى. ارالارىندا، ونىمدەرىن ەكسپورتتاپ جاتقاندارى دا بار، بۇل ءبارىمىزدى قۋانتادى، - دەدى قالا اكىمى.

بايقاۋ جەڭىمپازدارى 3 اتالىم بويىنشا ماراپاتتالدى. «ەڭ ۇزدىك ازىق- تۇلىك تاۋارى» اتالىمى بويىنشا «راحات» كونديتەرلىك فابريكاسى 1-ورىندى يەلەندى. جۇلدەلى 2-ورىنعا - «اقساي نان» نان- توقاش كومبيناتى، 3-ورىنعا «الماتى ءونىمى» سەرىكتەستىگى يە بولدى. «ەڭ ۇزدىك ازىق- تۇلىك تاۋارى» اتالىمىن يەمدەنۋگە 32 كومپانيا قاتىسقان بولاتىن. ناتيجەسىندە، «راحات» فابريكاسى توپ جاردى. «راحاتتىڭ» توپ جاراتىنداي ءجونى بار، سەبەبى ول - 70 -جىلدىق تاريحى بار قازاقستانداعى ەڭ مىقتى كونديتەر فابريكاسى. ونىڭ العاشقى ونىمدەرى سوناۋ ۇلى وتان سوعىسى جىلدارىندا ماسكەۋ ارقىلى مايدانعا اتتاندى.

بۇگىندە بۇل كومپانيادا 3500 ادام جۇمىس ىستەيدى. 10 ءتۇرلى توپ بويىنشا 250 ءتۇرلى كونديتەر ونىمدەرىن شىعارادى. «راحات» ا ق - قازاقستانداعى ديابەتپەن اۋىراتىن ناۋقاستارعا ارناپ كونديتەرلىك ونىمدەرىن شىعاراتىن جالعىز كومپانيا. كومپانيانىڭ ونىمدەرى حالىقارالىق ستاندارتتارعا ساي ساپالى شىعارىلادى. سودان بولار، ونىڭ ونىمدەرى تەك قازاقستانعا عانا ەمەس، رەسەي، وزبەكستان، تاجىكستان، قىرعىزستان، گەرمانيا، قىتاي، اۋعانستان سەكىلدى ەلدەرگە ەكسپورتتالادى. بۇگىندە كومپانيانىڭ العا قويعان ماقساتى - ورتالىق ازياداعى №1 كومپانياعا اينالۋ.

 ال بايقاۋدىڭ «وندىرىستىك باعىتتاعى ۇزدىك تاۋار» اتالىمى بويىنشا «Hyundai Trans Auto» جشس جۇلدەلى 1-ورىندى جەڭىپ الدى. «استانا موتورس» قمك قۇرامىنداعى «Hyundai Trans Auto»  ج ش س اۆتو جيناقتاۋشى مەكەمەسى 2011 -جىلى قۇرىلعان بولاتىن. بۇل كومپانيا، نەگىزىنەن، «Hyundai» كوممەرتسيالىق تەحنيكاسىنىڭ نەگىزىندە قۇرىلىپ، SKD 4 كەستەسى بويىنشا ءوندىرىستىڭ جوعارى تەحنولوگيالىق دەڭگەيى بويىنشا جۇمىسقا كىرىستى. وسى ماقساتتا، كومپانياعا ءبىر ميلليارد تەڭگەدەن استام ينۆەستيتسيا تارتىلدى. «Hyundai Auto Trans» كومپانياسى وڭتۇستىك كورەيادەن كەلەتىن جۇك كولىكتەر مەن اۋىر تەحنيكانى قۇراستىرۋعا ماماندانعان. بايقاۋدىڭ «وندىرىستىك باعىتتاعى ۇزدىك تاۋار» اتالىمىنا 44 كومپانيا تالاستى. «Hyundai Trans Auto» كومپانياسىنان كەيىنگى 2-ورىندى «الماتى كوپىر كونسترۋكتسيالارى زاۋىتى» جشس، 3-ورىندى «اكۆامەتر» جشس يەلەندى.

 بايقاۋدىڭ «حالىق تۇتىناتىن ۇزدىك تاۋار» اتالىمىندا 1-ورىنعا «LG Electronics» ج ش س يە بولدى. «LG Electronics» كومپانياسى كورمە- بايقاۋعا 4K OLED TV (55EG960V مودەلى)، SUPER UHD TV (65UF950V مودەلى)، Smart TV (55LF630V مودەلى) سەكىلدى جاڭا تەلەديدارلارىن ۇسىندى. ءسويتىپ، بايقاۋدىڭ 1-ورىنىن وسىمەن ەكىنشى مارتە جەڭىپ الدى. بۇدان بولەك «LG Electronics» مەكەمەسىنىڭ «التىن ساپا» بايقاۋىنىڭ ەكى دۇركىن (2006, 2012 -جىلدارى) جەڭىمپازى بولعانى تاعى بار.

سول سەكىلدى، 2010 جانە 2014 -جىلدارى LG كومپانياسىنىڭ تەلەديدارىنا حالىقتىق ساپا بەلگىسى بەرىلدى. ەستەرىڭىزگە سالا كەتەيىك، LG Electronics -  الەمدەگى ەڭ ۇزدىك كومپانيانىڭ ءبىرى. نەگىزىنەن، نارىقتاعى تۇتىنۋشىلار ەلەكترونيكاسىن، موبيلدىك بايلانىس پەن تۇرمىستىق تەحنيكانى، يننوۆاتسيالىق تەحنولوگيالاردى قۇراستىرىپ كەلەدى.

كومپانيانىڭ قازاقستانداعى زاۋىتى وسىدان 17 -جىل بۇرىن الماتىدا قۇرىلعان بولاتىن. سودان بەرى كومپانيانىڭ تەلەديدارلارى ورتالىق ازياداعى ەڭ نەگىزگى حالىقارالىق ونىمگە اينالدى. بۇل اتالىمدا، «LG Electronics» كومپانياسىنان كەيىنگى 2-ورىن «كازلەگپروم» ، ال 3-ورىن «الۆي پليۋس» كومپانيالارىنا بۇيىردى. قاپەرگە سالا كەتەيىك، ەندى اتالعان جەڭىمپاز كومپانيالار جەلتوقسان ايىندا استانادا وتەتىن فينالدىق بايقاۋدا باق سىنايتىن بولادى.

سەرىكبول حاسان

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى