سەرىك احمەتوۆتى ايىپتاعان قارجى پوليتسەيى پارامەن ۇستالدى

ول ەلىمىزدىڭ ەكس پرەمەر-ءمينيسترى سەرىك احمەتوۆتى ۇستاپ بەرگەنىمەن تانىمال.

قارجى پوليتسياسى قۇرىلىمى وزگەرىسكە ۇشىراعان سوڭ، كۇشىبايەۆ جاڭا قىزمەتكە شاقىرىلعان. ول سولتۇستىك قازاقستان وبلىسىندا مەملەكەتتىك كىرىس دەپارتامەنتى جانىنداعى ەكونوميكالىق زەرتتەۋ، جەدەل ىزدەستىرۋ توبىنىڭ جەتەكشىسى بولعان.

ءبىر قىزىعى، كولەڭكەلى بيزنەسپەن كۇرەسىپ جۇرگەن مۇرات كۇشىبايەۆتىڭ ءوزى پارامەن ۇستالدى.

ول زاڭسىز الكوگول ساتۋمەن اينالىسىپ جۇرگەن كاسىپكەر ا. زارگارياننان ونىڭ كولەڭكەلى بيزنەسىنە كوز جۇما قاراۋ ءۇشىن $10 مىڭ كولەمىندە پارا سۇراعان. الايدا، ءوز تاۋارىنىڭ قۇنى 2 ميلليوننان اسپايتىنىن ايتقان كاسىپكەر كۇشىبايەۆقا $8 مىڭ بەرۋگە كەلىسەدى.

اقشانى العان سوڭ كۇشىبايەۆ قىلمىسىن جاسىرۋ ماقساتىندا كاسىپكەر ءوزىن پارا الۋعا يتەرمەلەدى دەپ راپورت دايىنداعان. ءبىراق كاسىپكەر دە قاراپ قالماي، ءتيىستى ورىندارعا حابارلاسادى.

ناتيجەسىندە، ۇ ق ك ماماندارى تاجىريبەلى قارجى پوليتسەيى سانالعان مۇرات كۇشىبايەۆتى قولعا ءتۇسىردى.

«مۇنداي تاجىريبەلى ماماندى پارامەن ۇستاۋ وڭاي شارۋا ەمەس. الايدا، ول بار كىناسىن مويىندادى»، - دەيدى س ق و مەملەكەتتىك قىزمەت جانە جەمقورلىققا قارسى كۇرەس اگەنتتىگىنىڭ باسشىسى شىڭعىس قابدۋللا.

مۇرات كۇشىبايەۆ ءوز ورتاسىندا جوعارعى سوت مۇشەلەرى الماز تاشەنوۆ پەن سايلاۋبەك جاكىشوۆتى، بۇرىنعى پرەمەر-مينيستر سەرىك احمەتوۆ پەن قاراعاندى وبلىسىنىڭ ەكس-اكىمى باۋىرجان ابدىشيەۆتى، سونىمەن قاتار كەنشىلەر وڭىرىندەگى بىرنەشە شەنەۋنىكتى پارا العانى ءۇشىن ۇستاپ بەرگەنىمەن تانىمال.

ول ەرەكشە كورسەتكىشتەرى ءۇشىن ەكى رەت مەدالمەن ماراپاتتالعان.

kazgazeta.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى