فۋتبول: «قايرات» ەۋروپا ليگاسىنىڭ پلەي-وفف كەزەڭىنە جولداما الدى

ويىن بارىسىندا باسىمدىلىق الاڭ يەلەرىنىڭ جاعىندا بولعانىمەن، ۆلاديمير ۆايسستىڭ شاكىرتتەرى قورعانىستى نىق ۇستاپ، وڭتايى كەلگەندە، قارسى شابۋىلداۋعا تىرىستى. بۇل تاكتيكا ەكىنشى تايمدا ءوز جەمىسىن بەردى. 59 -مينۋتتا «ابەردين» قاقپاسىنىڭ الدىنداعى قاربالاس ءساتتى شەبەر پايدالانعان «قايراتتىڭ» مەرگەن ويىنشىسى جەرار گوۋ ەسەپ اشتى. كەزدەسۋ سوڭىنا تامان شوتلانديالىق كوماندانىڭ شابۋىلى ۇدەي ءتۇستى. 84-مينۋتتا ايىپ دوبىن بەرۋ ساتىندە كەنني ماكلين قاقپا بۇرىشىن ءدال كوزدەدى. سوڭعى سەكۋندتاردا «قايراتتىڭ» قاقپاشىسى ۆلاديمير پلوتنيكوۆ كەرەمەت شەبەرلىك كورسەتىپ، قاقپاسىن امان الىپ قالدى. ءسويتىپ تارتىستى ويىن 1:1 ەسەبىمەن اياقتالىپ، ەكى كەزدەسۋ قورىتىندىسىمەن (الماتىداعى ماتچتا الاڭ يەلەرى 2:1 ەسەبىمەن ۇتقان بولاتىن) «قايرات» پلەي-وفف كەزەڭىنە جولداما الدى.

ەسكە سالا كەتەيىك، وسىنىڭ الدىندا «استانا» كومانداسى ەۋروپا چەمپيوندارى ليگاسىنىڭ پلەي-وفف كەزەڭىنە جولداما العان بولاتىن. سونىمەن، بيىل قازاقستاندىق كوماندالار ءوز تاريحىندا ۇزدىك تابىستارىنا قول جەتكىزىپ وتىر.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى