الەمەتتىك جەلىلەردە قاپتاپ كەتكەن تەست سۇراقتار نەسىمەن قاۋىپتى؟
ساراپشىلار، دەگەنمەن، ولار پايدالانۋشىلار ءۇشىن اسا ۇلكەن قاۋىپ ءتوندىرۋى مۇمكىن دەگەن سەنىمدە. وسىنداي تەستىلەردى جاساۋدان جالىقپايتىن ادامعا بۇل نەسىمەن قاۋىپتى ەكەن؟
تەست جاريالانعان رەسۋرستاردىڭ يەلەرى ءجيى ءوز پاراقتارىندا جارناما ورنالاستىرۋ ارقىلى پايدا تابادى. ءدال وسى سەبەپتەن ينتەرنەتتەگى تەستىلەر قاراپايىم ءارى تارتىمدى ەتىپ جاسالعان، ويتكەنى ولاردىڭ نەگىزگى ماقساتى كوپ پايدالانۋشىنى قىزىقتىرۋ. دەسەك تە، وسىنداي تەستىلەردىڭ تانىمالدىعى باس پايداسى ءۇشىن جەكە مالىمەتتەرگە يە بولعىسى كەلەتىن الاياقتاردىڭ نازارىن اۋدارتۋى مۇمكىن.
«گازەتا. Ru» سايتىنا بەرگەن سۇحباتىندا Zecurion كومپانياسى باس ديرەكتورىنىڭ ورىنباسارى الەكساندر كوۆاليەۆ پايدالانۋشىلاردىڭ كوپتەپ شوعىرلانۋى كيبەرقىلمىسكەرلەردىڭ نازارىن اۋدارتۋى مۇمكىن دەيدى. ولاردى «تەست ويلاپ شىعار دا Facebook-كە كىرۋگە مۇمكىندىك ال» دەگەن ءادىستىڭ قاراپايىمدىلىعى دا قىزىقتىرادى. ونىڭ ايتۋىنشا، وسىنداي تەستىلەردىڭ كومەگىمەن مالىمەتتەرگە يە بولۋ وقيعالارى ءالى كەزدەسكەن جوق، دەگەنمەن بۇل كەيىن بەلەڭ الۋى مۇمكىن.
«قانداي دا ءبىر مەگا تانىمال تەست نەمەسە ساۋالناما سەرياسىنا ۆيرۋس جۇكتەسە بولعانى، ول بارلىق پايدالانۋشىلاردىڭ جەكە جانە قارجى مالىمەتتەرىن جيناقتايتىن بولادى. بۇل وتە قاۋىپتى»، - دەپ ەسكەرتتى ساراپشى.
تەست جاساعاندا مۇقيات بولۋ كەرەك. «پروفيلگە كىرۋگە رۇقسات سۇرالعاندا، پايدالانۋشى ادەتتەگىدەي «كەلىسەمىن» دەپ باسا سالۋى مۇمكىن. قاۋىپتى ساۋالنامالار باسقالارىنا ۇقساس ەتىپ جاسالادى، ونى ادامدار ايىرا الماي قالادى»، - دەيدى مامان.
ساراپشىنىڭ ايتۋىنشا، بۇنداي تەستىلەر ارقىلى پايدالانۋشىنىڭ اتى-ءجونى مەن ەلەكتروندىق پوشتاسىنىڭ ادرەسى ۇرلانىپ، ولار كەم دەگەندە سپام رەتىندە تاراتىلۋى مۇمكىن.
تەستىلەردىڭ جانىنداعى سىلتەمەلەرگە دە وتپەي-اق قويعان دۇرىس، ەلەكتروندىق پوشتا، بانك كارتالارىنىڭ مالىمەتى مەن قۇپياسوزدەرىن، تەلەفون نومىرلەرىن ەنگىزبەگەن ابزال.
