التىن تۇلپار الامانىندا ات سىنشىلارى مەن ات تاعالاۋشىلار سايىسى قوسا ۇيىمداستىرىلماق
اتالمىش بايگە تەك جۇيرىكتەر سايىسى عانا ەمەس، جۇيرىكتى تاپ باسىپ تانيتىن ات سىنشىلارىنىڭ جانە ات تاعالاۋشى شەبەرلەردىڭ دە سايىسى قوسا ۇيىمداستىرىلماق، دەپ حابارلايدى kazaitys.kz.
ق ر ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى ەرلەن وسپانوۆتىڭ ايتۋىنشا، جۇيرىكتەردىڭ ەركىن تىنىس اشۋىنا مۇمكىندىك بەرۋ ءۇشىن «التىن تۇلپاردىڭ» جارىس قاشىقتىعى 51 شاقىرىمعا ۇزارتىلعان. بايگەگە 14 وبلىس پەن استانا جانە الماتى قالالارىنىڭ ءارقايسىسىنان 10 سايگۇلىكتەن، كەمىندە 160 تۇلپار قاتىسادى دەپ كۇتىلۋدە. جارىسقا سايگۇلىكتەردىڭ بارلىق تۇقىم- تۇرلەرى قاتىستىرىلادى.
بيىلعى«التىن تۇلپار» الامان بايگەسىنىڭ جۇلدە قورى 23 ميلليون تەڭگەنى قۇراسا، باس جۇلدە - 10 ميلليون تەڭگە. سونداي-اق مارەگە العاشقى جەتكەن 9 تۇلپارعا قازاقتىڭ ەپوستىق جىرلارىندا اتى اڭىزعا اينالعان دۇلدۇلدەر: قۇلاگەر، بايشۇبار، قۋباس، قاراقاسقا، اقتابان، بوزاۋىز، تايبۋرىل، كوكبۋرىل، شالقاسقا، تارلان اتتى تۇلپارلار نوميناتسياسى بويىنشا ديپلوم جانە قارجىلاي سىيلىقتار بەرۋ جوسپارلانۋدا.
جارىس ءار اينالىمى 12,5 شاقىرىمدى قۇرايتىن 4 شەڭبەرمەن وتەدى. شەڭبەر بويىنا ءاربىر 2 شاقىرىم سايىن ءبىر- بىردەن 7 باقىلاۋ بەكەتى ورنالاسادى. بەكەتتەردە تەلەكامەرالار مەن تورەشىلەر، ادام جانە مال دارىگەرلەرى، ءتارتىپ ساقشىلارى تۇرادى. تورەشىلەر كولدەنەڭنەن ات قوسىلىپ كەتپەۋىن باقىلايتىن بولسا، تەلەكامەرالار بايگە بارىسىن حالىققا تىكەلەي كورسەتەدى. بۇلداردان باسقا، 2 تىكۇشاق جارىس بارىسىن بيىكتەن باقىلاپ كامەراعا تۇسىرەدى. كورەرمەندەر مەن ات يەلەرى ءوز تۇلپارلارىنىڭ قاي تۇستا شاۋىپ بارا جاتقاندىعىن LED ەكراننان باقىلاۋعا مۇمكىندىك قاراستىرىلعان.
