الماتىدا كەڭەس وداعىنىڭ ەكى مارتە باتىرى تالعات بيگەلدينوۆكە ارنالعان مۋزەي اشىلادى - فوتو
بۇل تۋرالى بۇگىن «قازاقپارات» تىلشىسىنە «گەنەرالدار كەڭەسى» رەسپۋبليكالىق قوعامدىق بىرلەستىگى ءتوراعاسىنىڭ ورىنباسارى، گەنەرال-مايور ماحمۇت تولەعۇسوۆ ءمالىم ەتتى.
«بۇگىن قازاقستان رەسپۋبليكاسى قورعانىس مينيسترلىگىنىڭ «ورتالىق ارميا ۇيىندە» تالعات بيگەلدينوۆكە ارنالعان جەكە ەستەلىك بۇرىش اشىلدى. ول جەرگە باتىر اعامىزدىڭ ءومىرىنىڭ ءار كەزەڭىندە تۇسكەن فوتوسۋرەتتەرى، وزىنە قاتىستى قۇجاتتار، كىتاپتار، گازەت جانە جۋرنالدار قويىلدى. بولاشاقتا الماتىدا ارنايى مۋزەي اشىلادى. بۇل ماسەلە قازىر قالا اكىمدىگىندە تالقىلانىپ جاتىر. ازىرگە بۇل باعىتتا فوتوسۋرەتتەر، بەينەباياندار، فيلمدەر، قۇجاتتار جانە باسقا دا ماتەريالداردى جيناۋ جۇمىستارىن جۇرگىزىپ جاتىرمىز»، - دەدى م. تولەعۇسوۆ.
سونىمەن قاتار ول بيىل ماسكەۋ قالاسىنىڭ تاعزىم تاۋىندا ورنالاسقان ۇلى وتان سوعىسىنا ارنالعان ورتالىق مەملەكەتتىك مۋزەيگە تالعات بيگەلدينوۆتىڭ ءمۇسىنى قويىلاتىندىعىن جەتكىزدى.
«اتالمىش مۋزەيدىڭ باسشىلىعىمەن ناقتى كەلىسىمگە قول جەتكىزىلدى. قۇداي قالاسا، ۇستىمىزدەگى جىلى 9- جەلتوقساندا مۋزەيدىڭ داڭق زالىنا تالعات بيگەلدينوۆتىڭ ءمۇسىنى قويىلادى. ال كەلەسى جىلى كەڭەس وداعىنىڭ باتىرى، ق ر تۇڭعىش قورعانىس ءمينيسترى، ارميا گەنەرالى ساعادات نۇرماعامبەتوۆتىڭ ءمۇسىنى قويىلادى. 2016-جىلدىڭ جەلتوقسانىنا دەيىن قازاقستاننان شىققان ەكى دۇركىن كەڭەس وداعىنىڭ باتىرلارى - سەرگەي لۋگانسكي، لەونيد بەدا جانە يۆان پاۆلوۆتىڭ مۇسىندەرى قويىلادى. قازىر كوپ جەردە سوعىس تاريحى بۇرمالانىپ جاتىر. ءبىز مۇنداي ارەكەتتەرگە قۋاتتى پاتريوتتىق قوزعالىسپەن جاۋاپ بەرۋىمىز كەرەك. بارشا جۇرت قازاقستاننان شىققان ەرەن ەرلەر جايىندا ءبىلىپ ءجۇرسىن»، - دەدى گەنەرال-مايور م. تولەعۇسوۆ.
اۆتور: جاپپاربەرگەن ايبوتا
