الماتى وبلىسىندا ءتىل ۇيرەتۋدىڭ يننوۆاتسيالىق ادىستەرى تالقىلاندى
سەمينار بارىسىندا مەملەكەتتىك ءتىلدى مەڭگەرۋ بويىنشا ءتۇرلى ۇزدىك ادىستەمەلەر تانىستىرىلدى. بۇل تۋرالى وبلىس اكىمىنىڭ باسپا ءسوز قىزمەتىنەن حابارلايدى.
«ۇلىتاۋ» مادەني-لينگۆيستيكالىق لاگەر بازاسىندا وتكەن باسقوسۋ الماتى قالاسىنداعى مەنەدجمەنت ۋنيۆەرسيتەتىمەن بىرىگىپ «قوعامدىق كەلىسىم» ر م م ۇيىمداستىردى.
وعان قازاقستان حالقى اسسامبلەياسىنىڭ مۇشەلەرى، «قوعامدىق كەلىسىم» ر م م ماماندارى، مەملەكەتتىك ورگاندار وكىلدەرى، دوستىق ۇيلەرى مەن ەتنومادەني بىرلەستىكتەردىڭ جەكسەنبىلىك مەكتەپتەرىنىڭ ادىسكەر-وقىتۋشىلارى جانە باسقا دا ازاماتتار قاتىستى.
6 كۇن بويى مودەراتورلار تىڭداۋشىلارعا تەوريالىق جانە پراكتيكالىق ساباقتار جۇرگىزدى. سەمينار بارىسىندا ءاربىر قاتىسۋشى بەلگىلى ءبىر ادىستەمەنى تاجىريبە جۇزىندە اپروباتسيادان وتكىزىپ كورۋگە مۇمكىندىك الدى.
سونىمەن قاتار «100 ناقتى قادام» ۇلت جوسپارىن جۇزەگە اسىرۋدىڭ نەگىزگى شارالارى شەڭبەرىندە «مەملەكەتتىك ءتىلدى جانە ءۇش تىلدە ءبىلىم بەرۋدى دامىتۋدىڭ يننوۆاتسيالىق ادىستەرى» تاقىرىبىندا دوڭگەلەك ۇستەل وتكىزىلدى.
سەمينار-ترەنينگ قورىتىندىسىندا قاتىسۋشىلاردىڭ بارلىعىنا سەرتيفيكات بەرىلدى. «قوعامدىق كەلىسىم» ر م م ديرەكتورىنىڭ ورىنباسارى، فيلولوگيا عىلىمدارىنىڭ دوكتورى، پروفەسسور عازيز تەلەبايەۆ قاتىسۋشىلاردىڭ بارلىعى دا وقۋ-ادىستەمەلىك ماتەريالدارمەن قامتاماسىز ەتىلگەنىن، وڭىرلەردە جاڭا ادىستەمەلەردى ەنگىزۋ وقىتۋدىڭ ماڭىزدى ناتيجەسى بولاتىنىن اتاپ ءوتتى.
