شىمكەنت پەن شاردارا اراسىندا ۇشاق قاتىنايدى
سونىمەن قاتار، قالاداعى ەسكى اۋەجايدى قالپىنا كەلتىرۋ جوسپارى دا ءبىرازدان بەرى كوتەرىلىپ كەلە جاتقان. بۇل ەكى نىسان دا وبلىس اكىمىنىڭ تىكەلەي باقىلاۋىندا تۇرعان ماسەلە ەدى.
شارداراعا جاساعان ءىس-ساپارى كەزىندە وبلىس اكىمى اسقار مىرزاحمەتوۆ اۋەجاي الاڭىنا ات باسىن ارنايى بۇردى، دەپ حابارلايدى اكىمدىكتىڭ باسپا ءسوز قىزمەتىنەن. ۇزىندىعى 1625 مەتر، بەتوندالعان اۋدانىنىڭ كولەمى 75000 شارشى مەتردى قۇرايتىن اەروپورت كەشەنىندە كوپ جىلداردان بەرى تىنىشتىق ورناعان-دى.
باسقارما باسشىلارىمەن قارجى ماسەلەسىن اقىلداسقان اسقار يسابەك ۇلى اۋەجايدى قايتا قالپىنا كەلتىرۋ جۇمىستارىن تەز ارادا باستاۋ ءۇشىن تاپسىرما بەردى. دالىرەك ايتاتىن بولساق، ءبىر اي كولەمىندە جۇمىسشى توبى قۇرىلىپ، جوندەۋ جۇمىستارى باستالماق.
ايماق باسشىسىنان تاپسىرما العان وبلىستىق ەنەرگەتيكا، تۇرعىن ءۇي-كوممۋنالدىق شارۋاشىلىق جانە جولاۋشىلار كولىگى باسقارماسىنىڭ باسشىسى نۇرلان الدامجاروۆ: «جۇمىسشى توبىن قۇرۋ جونىندە وبلىس اكىمى شەشىم شىعاردى. اۋەجايدى قايتا قۇرىلىمداۋ جۇمىسى ءبىر اي كولەمىندە باستالىپ، ەكى ايدىڭ ىشىندە اياقتالۋى ءتيىس. بۇل شارۋاعا 200 ميلليون تەڭگە قارجى جۇمسالماقشى. جوندەۋ جۇمىستارى «وڭتۇستىك س پ ك» ارقىلى جۇرگىزىلەدى. اللا جازسا، ەكى ايدان كەيىن شاردارانىڭ اۋەجايى العاشقى ۇشاقتارىن قابىلدايتىن بولادى دەپ جوسپارلاپ وتىرمىز»، - دەدى.
اۋدان اكىمىنىڭ ورىنباسارى تۇرسىنقۇل بايتۇرعانوۆتىڭ ايتۋىنشا، باستاپقى ۋاقىتتا شاردارا اۋەجايىنان شىمكەنت باعىتىنا ۇشاقتار ۇشىرىلادى دا، كەلەشەكتە الماتى مەن استانا باعىتتارىنا رەيستەر قويىلماق.
«تۋريزمدى دامىتۋ ءۇشىن اۋەجايدى ىسكە قوسۋدىڭ ماڭىزى وتە زور. وبلىس ورتالىعى مەن باسقا دا قالالاردا تۇراتىن ازاماتتار ءبىزدىڭ شالقار كولىمىزگە دەمالۋ ءۇشىن اۋە كولىگىمەن ءاپ-ساتتە ۇشىپ كەلە الاتىن بولادى. اۋداننىڭ ەكونوميكالىق-الەۋمەتتىك دامۋىنا ءارۋاقىتتا دا قولداۋ كورسەتىپ وتىراتىن اسقار يسابەك ۇلىنىڭ بۇل قامقورلىعىنا شاردارالىقتاردىڭ العىستارى شەكسىز»، - دەيدى ت. بايتۇرعانوۆ.
