اباي تويى - بارشا قازاق دالاسىنا، ءتىپتى الەمگە ورتاق توي

بۇل تۋرالى وبلىس اكىمىنىڭ ورىنباسارى جاقسىلىق ومار مالىمدەدى.

ۇلى اقىننىڭ مەرەيتويىنا ارنالعان شارالار 5- تامىزدا سەمەي قالاسىندا اباي اتىنداعى وپەرا جانە بالەت تەاترىنىڭ جەكە ورىنداۋشىسى شاھيماردان ءابىلوۆتىڭ جانە ابايتانۋشى عاريفوللا ەسىمنىڭ قاتىسۋىمەن وتەتىن مۋزىكالىق كەشتەن باستاۋ الادى، دەپ حابارلايدى «قازاقستان» ۇلتتىق تەلەارناسىنىڭ رەسمي سايتى.

6- تامىزدا ەلباسى قولداۋى جانە مەملەكەتتىك ءتىلدى دامىتۋ قورىنىڭ تاپسىرىسىمەن «اباي الەمى» اتتى تۇڭعىش ەنتسيكلوپەديالىق پورتال اشىلادى. جوبا اياسىندا «ابايدىڭ ۇلى جۇمباعى» اتتى دەرەكتى فيلمنىڭ تۇساۋى كەسىلمەك. جاڭا تۋىندىدا كورەرمەن قاۋىم ابايدىڭ جاڭا قىرىن ءبىلىپ، العان ءبىلىمى، شىعىس تاربيەسى تۋرالى قۇندى دەرەكتەرمەن تانىسادى. سونداي-اق، وسى كۇنى «اباي جانە الەمدىك وركەنيەت» اتتى حالىقارالىق عىلىمي-پراكتيكالىق كونفەرەنسيا وتەدى. باس قوسۋعا شەتەلدىك ادەبيەتتانۋشىلار، فيلوسوف، تاريحشىلار، ءتىل ماماندارى مەن اقىن شىعارمالارىن الەم تىلدەرىنە ءتارجىمالاعان شەتەلدىك اۋدارماشىلار قاتىسادى. مەرەكەلىك شارالار 7 تامىزدا اباي اۋدانىندا جالعاسادى. شارا قوناقتارى «اباي- شاكارىم» مەموريالدىق كەشەنىن، «ەڭلىك-كەبەك» ەسكەرتكىشىن ارالاپ، ماماي باتىر ەسكەرتكىشىنىڭ اشىلۋىنا قاتىسادى. سونداي-اق، بۇل كۇنى قاراۋىلدا قازاق كۇرەسىنەن ەل چەمپيوناتى، «اباي تويى - حالىق تويى» مەرەكەلىك شاراسى، «جورعا جارىس» سايىسى وتەدى. جوسپارلانعان ءىس-شارالار «ادامزاتتىڭ ءبارىن ءسۇي، باۋىرىم دەپ» اتتى رەسپۋبليكالىق اقىندار ايتىسىنا ۇلاسادى. الامان ايتىستا ەلىمىزدىڭ ءار اۋماعىنان كەلگەن 12 ۇزدىك ايتىسكەر قاتىسادى. اقىندار ايتىسىنان كەيىن قاراۋىلتوبەدە «الامان بايگە» جانە «اباي تويىنىڭ باس بالۋانى» سايىسى وتەدى. «مەرەيتوي اعىمداعى جىلى ءوزىنىڭ اۋقىمدىلىعىمەن عانا ەمەس، تانىمدىلىعىمەن دە ەرەكشەلەنەدى. اباي تويى - بارشا قازاق دالاسىنا، ءتىپتى الەمگە ورتاق توي. شاراعا قاتىسۋشى ءاربىر قوناق ابايدىڭ رۋحاني جانە شىعارماشىلىق الەمىنە ساپار شەگە الادى»، دەدى ج. ومار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى