رەسەي كومانداسى قازاقستاندىق ۇيىمداستىرۋشىلاردىڭ وليمپيادا وتكىزۋ تاجىريبەسىنە ارقا سۇيەيدى - فوتو
بۇل تۋرالى قازاقپارات تىلشىسىنە الماتىدا ينفورماتيكادان وتكەن حالىقارالىق وليمپيادانىڭ جابىلۋ سالتاناتىندا ر ف دەلەگاتسياسىنىڭ جەتەكشىسى ۆلاديمير كيريۋحين ايتتى.
«ر ف دەلەگاتسياسىنىڭ ءتۇرلى باعىتتاعى جۇمىس توپتارىنا قازاقستاندىق ارىپتەستەرىمەن كەڭەسىپ، وليمپيادا وتكىزۋ جايلى بار ماعلۇماتتى ءبىلۋ تاپسىرىلدى. بۇل تاجىريبە بىزگە وليمپيادا وتكىزۋ كەزىندە وتە كەرەك بولادى. جاقىن ارادا ۇيىمداستىرۋ كوميتەتىنىڭ كەڭەسى وتەدى. وندا ءار جۇمىس توبىنىڭ جۇمىس جوسپارى بەكىتىلىپ، بەلسەندى دايىندىققا كىرىسەمىز. اسىرەسە، كەلۋشىلەردى ورنالاستىرۋ، كولىكپەن قامتۋ، ولاردىڭ جۇمىسىن ۇيىمداستىرۋ، تاماقتاندىرۋ، ۆەنتيلياتسيا، ساپالى قىزمەت كورسەتۋ ماسەلەلەرى بويىنشا كەڭەسىپ جاتىرمىز. سىرتتان قاراعاندا بارلىعى وسىلاي بولۋ كەرەك سياقتى بولىپ تۇرادى. ءبىراق ونىڭ ارتىندا قانشا كوماندانىڭ ەرەن ەڭبەگى تۇر. تەحنيكالىق ماسەلە، كومپيۋتەرلىك زالداردى، سايىس وتەتىن الاڭدى جابدىقتاۋ وڭايعا تۇسپەيدى»، - دەدى ول.
ۆلاديمير كيريۋحين الماتىعا كەلگەن 83 ەلدىڭ بارلىعىنا شاقىرتۋ جىبەرىلەتىنىن ايتتى. «ساياسي جاعدايعا بايلانىستى ۆيزا بەرمەۋ دەگەن سياقتى ماسەلە بولمايدى. ءبىز بارىنە اشىقپىز»، - دەدى ول.
رەسەيلىك مامان وليمپيادا تاپسىرمالارىنىڭ جاقسى جاسالعانىن جەتكىزدى.
«ءبىرىنشى تۋردا ماكسيمالدى 300 بالدى 4 بالا جينادى. بۇل تاپسىرمالاردىڭ قيىن بولسا دا شەشۋگە بولاتىندىعىن كورسەتتى»، - دەدى رەسەي وكىلى.
ايتا كەتەيىك، شىلدەنىڭ 26- مەن تامىزدىڭ 1- ارالىعىندا ءال-فارابي اتىنداعى قازاق ۇلتتىق ۋنيۆەرسيتەتى بازاسىندا ينفورماتيكادان حالىقارالىق وليمپيادا ءوتتى. وعان الەمنىڭ 83 ەلىنەن 630 دەلەگات كەلدى.
وتاندىق قۇرامانىڭ ەنشىسىندە 4 مەدال بار ەكەندىگىن اتاپ ءوتۋ كەرەك. بەكجان بەكبولات ۇلى مەن مەيرامبەك ءومىرزاق، نايزابەك التىباي (415 جانە 414, 402 بال) كۇمىس مەدالدى ەنشىلەسە، دانيار مامينوۆ 323 بالمەن قولا مەدالعا قول جەتكىزدى.
سايىستىڭ ابسوليۋتتى چەمپيونى وڭتۇستىك كورەيادان كەلگەن دجي حاك يۋن ەكەنىن ايتا كەتۋ كەرەك. ودان كەيىن رەسەيلىك ميحايل يپاتوۆ - 561 بال، ا ق ش- تان كەلگەن ەندريۋ حە 555 بالمەن ءۇشىنشى ورىنعا تۇراقتادى.
