تۋعان جەردە دە لايىقتى دەمالىس ورىندارى بار

ال، شيپاجايدا دەمالعىسى كەلەتىن ازاماتتارعا الماتى، قاراعاندى، جامبىل وبلىستارىندا، سونداي-اق، سارىاعاش، راحمان بۇلاقتارى، جۇمباقتاس سياقتى اتاقتى شيپاجايلار بار. بەلسەندى دەمالىس ءتۇرىن تاڭداعاندار رافتينگپەن اينالىسىپ، اڭعا شىعىپ، بالىق اۋلاي الادى. تاۋ اۋاسىن جۇتقىسى كەلگەندەر الاتاۋ مەن التايدى ورلەپ، شاڭعى بازالارىندا دەمالۋىنا بولادى.

تاريحي-مادەني ەسكەرتكىشتەردى تاماشالاپ، زيارات جاسايمىن دەۋشىلەر وڭتۇستىك وڭىرلەردەگى قوجا احمەت ياساۋي، ارىستان باب، ايشا ءبيبى، گاۋھار انا، ۋكاشا اتا ت. ب. كەسەنەلەرىنە جىل بويى ۇزدىكسىز اعىلىپ جاتادى. قازىر جاز مەزگىلى بولعاندىقتان، ءبىز جاعاجايداعى دەمالىستىڭ جاي-جاپسارىن ءبىر شولىپ وتكەندى ءجون كوردىك.

قازاقستاندىقتار، اسىرەسە الاكولگە ءجيى بارادى. كولەمى جونىنەن ەلىمىزدەگى سۋ ايدىندارى ىشىنەن ەكىنشى ورىندى الاتىن كولگە 15 كە جۋىق وزەن كەلىپ قۇيادى ەكەن. سۋىنىڭ ەمدىك قاسيەتى بار. سۋدىڭ قۇرامىندا حلوريد-ناتري تۇزى بولعاندىقتان، ول ادام دەنساۋلىعىنا وڭ اسەر ەتەدى. كەي دەرەكتەرگە كوز سالساق، الاكولگە جىلىنا 250 مىڭنان استام ادام دەمالۋعا كەلەدى ەكەن.

كولگە قالاي جەتۋگە بولادى؟ ەگەر استانادان جولعا شىقساڭىز، اۋەلى ۇشاقپەن الماتىعا جەتىپ الىپ، ءارى قاراي پويىز نەمەسە اۆتوبۋسپەن بارا الاسىز. ال الماتىدان پويىزعا وتىرىپ، كوكتۋما ستانتسياسىنا دەيىن جەتىپ الۋىڭىزعا بولادى. الماتىدان الاكولگە دەيىن شامامەن 650 شاقىرىم.

الاكولدە جەكەلەگەن پانسيوناتتار، سونداي-اق جەكە ۇيلەر دە قوناقتاردى جاتىن ورىنمەن، تاماقپەن قامتيدى. پانسيوناتتا ءبىر ادامعا كۇنىنە 5-15000 تەڭگە ارالىعىندا شىعىن شىعۋى مۇمكىن. ونىڭ ىشىنە 3 مەزگىل تاماق تا كىرەدى. جەكەلەگەن ۇيلەرگە ورنالاسساڭىز، ودان ارزانىراق بولۋى مۇمكىن، ءبىراق قىزمەت كورسەتۋ دەڭگەيى دە باعاسىنا ساي بولادى. كولدەن باسقا تابيعات تاڭعاجايىپتارىن تاماشالاعىڭىز كەلسە، جاقىن ماڭداعى جالاڭاشكول رودون بۇلاعىنا، جوڭعار الاتاۋىنا بارۋىڭىزعا دا بولادى.

جاقىندا عانا الاكولدىڭ ماڭىنداعى قابانباي اۋىلىندا دەمالىپ قايتقان سۋرەتشى، بلوگەر اڭساعان مۇستافا وسى ساپارى جايىندا ارنايى فوتورەپورتاج دايىندادى. ونىڭ ايتۋىنشا، پانسيونات پەن اس-اۋقاتىنىڭ ساپاسى وتە جاقسى، كول جاعالاۋى تازا. ول دەمالىستان تەك قانا ادەمى اسەرلەرمەن ورالعان. الاكول بويىنداعى رادياتسيادان تازارۋ ءۇشىن ءتىپتى عارىشكەرلەر دە شومىلعان كورىنەدى.

اۋماعى جونىنەن كاسپي، ارال تەڭىزدەرىنەن كەيىنگى ءۇشىنشى ورىندى الاتىن بالقاش ءۇش وبلىستىڭ اۋماعىنا سوزىلىپ جاتىر. ونىڭ جاعالاۋىندا دا دەمالىس ورىندارى از ەمەس. ونداعى باعا دا تاۋلىگىنە ادام باسىنا 5 مىڭ تەڭگەدەن باستالادى. ال ءۇي جالدايتىن بولساڭىز، ءار ادام ءۇشىن 2000 تەڭگەدەن الۋى مۇمكىن. ول تەك جاتىن ورىن ءۇشىن، تاماق بۇنىڭ ىشىنە كىرمەيدى.

كاسپي تەڭىزى جىلى سۋىمەن، تەڭىزدىڭ حوش يىسىمەن وزىنە باۋراپ الادى. مۇندا شومىلۋ ماۋسىمى مامىردان قىركۇيەككە دەيىن جالعاسادى. ال، اقتاۋ - قازاقستانداعى تەڭىز جاعاسىندا ورنالاسقان جالعىز قالا. سوندىقتان، بۇل جەردەن جاتىن ورىن تابۋ قيىن ەمەس. كوپشىلىك پاتەر جالداپ نەمەسە قوناق ۇيلەرگە توقتايدى. باعاسى تاۋلىگىنە 5000 تەڭگەدەن باستالادى. ال ەگەر بۇعان كوڭىلىڭىز تولماسا، «كەندىرلى»، «ستيگل» سەكىلدى دەمالىس ورىندارى، شاعالا ساناتوريى بار. بۇل دەمالىس كەشەندەرىندە كەلۋشىلەرگە بارلىق جاعداي جاسالعان.

ءبىز ەلىمىزدەگى ءۇش كولدىڭ جاعالاۋىندا قالاي دەمالۋعا بولاتىنىن تىلگە تيەك ەتتىك. ال ەندى وعان بارۋ ءۇشىن ءتيىمدى تۋرلار مەن ساياحاتتار جايىن تۋريستىك اگەنتتىكتەرگە حابارلاسىپ بىلە الاسىز. شەتەلدەن كەم سوقپايتىن دەمالىس ورىندارى، ساف تازا اۋا، تۋعان جەردىڭ تۇمسا تابيعاتى ءسىزدى بەي-جاي قالدىرماس دەگەن سەنىمدەمىز. رەسپۋبليكامىزدا بۇلاردان باسقا دا ءىرىلى-ۇساقتى دەمالىس ورىندارى جەتكىلىكتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى