كوكشەتاۋدا «وقجەتپەستىڭ» فۋتبول ورتالىعى اشىلدى
اشىلۋ ءراسىمى - قازاقستان فۋتبول فەدەراتسياسىنىڭ 2012-2022 -جىلدارعا ارنالعان قازاقستاندا بالالار جانە جاسوسپىرىمدەر فۋتبولىن دامىتۋ باعدارلاماسىن جۇزەگە اسىرۋ اياسىندا ءوتتى.
بۇل شارا اقمولا وبلىسىندا بالالار فۋتبولىن دامىتۋ مەن ءوز تۇلەكتەرىن تاربيەلەۋدە ناقتى قادام بولماق. فۋتبول ورتالىعىنا 9 جاس كاتەگورياسى بويىنشا 1997-2005 -جىلعى 200 دەن استام بالا قابىلدانعان. ءار توپقا جاس فۋتبولشىلاردى دايىنداۋ بويىنشا ارنايى ازىرلەنگەن باعدارلامامەن جۇمىس ىستەگەن بىلىكتى جاتتىقتىرۋشىلار جەتەكشىلىك ەتەدى. جۇمىستىڭ ماقساتى - «وقجەتپەس» كومانداسىنا كاسىبي ويىنشىلار تاربيەلەۋ جانە قالا مەن وبلىستىڭ جاسوسپىرىمدەرىن فۋتبولعا باۋلۋ.
سالتاناتتى شارادا جاس فۋتبولشىلار مەن كورەرمەندەر الدىندا اقمولا وبلىسىنىڭ دەنە شىنىقتىرۋ جانە سپورت باسقارماسىنىڭ جەتەكشىسى نادەجدا پاتيۋتكينا، فۋتبول ورتالىعىنىڭ تەحنيكالىق ديرەكتورى يۋري پانفيلوۆ، كوكشەتاۋ فۋتبولىنىڭ ارداگەرلەرى ۆيكتور پاۆلەنكو، نيكولاي وبەرەمكو، «وقجەتپەس» ف ك ديرەكتورى مىندەتىن اتقارۋشى نيكولاي پانين ءسوز سويلەدى. ولار كوكشەتاۋ قالاسىندا فۋتبول ورتالىعىنىڭ اشىلۋىنىڭ ماڭىزدىلىعىن اتاپ ءوتىپ، جاس فۋتبولشىلارعا جەتىستىكتەر تىلەدى.
