شىمكەنت كوشەلەرىنە ۇلتتىق ناقىشتاعى كومپوزيتسيالار قويىلىپ جاتىر
وبلىس، قالا باسشىلارىنىڭ باستاماسىمەن قالا كوشەلەرىنە ۇلتتىق ناقىشتاعى «شىمكەنت» اتالاتىن كومپوزيتسيالار قويىلىپ جاتىر، دەپ حابارلايدى otyrar.kz.
ۇلتتىق ويۋلاردىڭ كەسكىنىمەن ەگىلگەن گۇلدەردى جارىق بەرەتىن شامدار ارقىلى تۇندە دە كۇندىزگىدەي انىق كورۋگە بولادى. مۇنى كورگەن قالا تۇرعىندارى دا، كەلگەن قوناقتار دا سۇيسىنبەي وتپەسى انىق.
تەمىرلان تاس جولىنىڭ بويىندا دا بيىككە ۇمتىلعان ءتۇرلى- ءتۇستى گۇل ستەللا بوي كوتەرگەن. بيىكتىگى 14 مەترلىك بۇل كەشەن - ەڭ بيىك كومپوزيتسيا. بۇگىندە قۇرىلىسى جۇرگىزىلىپ جاتقان ورتالىق ساياباقتاعى كەلەسى كومپوزيتسيا «شاڭىراق» دەپ اتالادى.
جۇرتتىڭ كوز قۋانىشى بولار ساۋلەتتىك قۇرىلىمداردىڭ قۇرىلىسىنا 67 ميلليون تەڭگە بولىنگەن. جۇمىستى ورىنداۋشى مەردىگەر - وڭتۇستىك كورەيالىق كومپانيا ءبىر جىل بويى كومپازيتسيالاردى كۇتىپ-ۇستاۋعا مىندەتتەلگەن.
