كوكشەتاۋدا جەزوكشەلىكپەن اينالىسقاندار قولعا ءتۇستى

پوليتسەيلەردىڭ مالىمەتى بويىنشا ۇيىمداسقان قىلمىسپەن كۇرەس باسقارماسىنىڭ قىزمەتكەرلەرىمەن جەڭىل ءجۇرىستى قىزداردى انىقتاۋ ماقساتىندا جۇرگىزىلگەن رەيد بارىسىندا وبلىس ورتالىعىنداعى مونشا، ساۋنا جانە قوناق ۇيلەر نىساناعا الىنعان.

«تەكسەرىس بارىسىندا بۇل قوعامدىق ورىنداردان ارىن ساۋدالاپ جۇرگەن 15 تەن استام «تۇنگى كوبەلەك» ۇستالدى. ولاردىڭ دەنى وبلىستىڭ ءار وڭىرىنەن كەلگەن قىزدار. ولاردىڭ كەيبىرىنىڭ بالا- شاعاسى بار. ءتىپتى، ءبىر قىز وسىعان دەيىن ستوماتولوگيا كابينەتىندە مەدبيكە بولىپ جۇمىس ىستەپ، كەيىن قىسقارتۋعا ۇشىراعان كورىنەدى. قازىرگى كەزدە وسىنداي جەزوكشەلىكپەن اينالىسىپ اقشا تاۋىپ جۇرگەندەردى جاۋاپقا تارتۋ جونىندە زاڭ بولماعاندىقتان، قۇقىق قورعاۋ ورگاندارىنىڭ قىزمەتكەرلەرى تەك سۋرەت جانە بەينەتاسپاعا ءتۇسىرىپ، ەسەپكە الۋىمەن عانا شەكتەلدى» ، - دەيدى پوليتسەيلەر.

ەسكە سالا كەتسەك، بۇگىنگى كۇنى اقمولا وبلىسىندا بارلىعى 105 جەڭىل ءجۇرىستى تىركەلگەن. ولاردىڭ ورتاشا جاسى 23-30 شاماسىندا.

 اۆتور: اسلان وسپانوۆ  

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى