قىسقى وليمپيادا: الماتىلىقتار قالانىڭ كانديداتۋراسىن قولداۋعا اباي الاڭىنا جينالۋدا

تاريحي تاڭداۋ جاسالاتىن ساتكە ساناۋلى سەكۋندتار عانا قالدى.

الماتىلىقتار تۋعان قالاسىنىڭ جەڭىسىنە ۇلكەن ءۇمىت ارتىپ، رەسپۋبليكا سارايى الدىنداعى اباي الاڭىنا جينالدى. جينالعان حالىق كۋالا- لۋمپۋردا وتەتىن حالىقارالىق وليمپيادا كوميتەتىنىڭ سەسسياسىنان تىكەلەي كورسەتىلىمىن تاعاتسىز كۇتىپ وتىر.

جاستار الماتىنىڭ كانديداتۋراسىن قولداپ، فلەش-موب، پاتريوتتىق اكسيا ۇيىمداستىردى. ءتۇرلى- ءتۇستى كيىم كيگەن جاستار الاڭدا وليمپيادالىق شەڭبەردىڭ، قالا سيمۆولى - المانىڭ سۋرەتىن سالدى. ورتادا ۆەلوسيپەدشىلەر مەن اكروباتتار ونەر كورسەتتى.

ال الماتىنى قولداۋ ءۇشىن ەلىمىزدىڭ كوپتەگەن تانىمال سپورتشىلارى مالايزياعا اتتانىپ كەتتى. ولاردىڭ قاتارىندا بوكستان وليمپيادا چەمپيوندارى ەرماحان ىبىرايىموۆ، سەرىك ساپيەۆ جانە كونكيدەن الەم چەمپيونى دەنيس كۋزين، سوچيدەگى قىسقى وليمپيادانىڭ جۇلدەگەرى، مانەرلەپ سىرعاناۋشى دەنيس تەن، ۆولەيبولشى سابينا التىنبەكوۆا جانە تاعى باسقا بەلگىلى سپورتشىلار بار.

الماتى قالاسىنىڭ تانىستىرىلىمىن ق ر ۇكىمەتىنىڭ باسشىسى كارىم ءماسىموۆ پەن الماتى اكىمى احمەتجان ەسىموۆ وتكىزدى.

تانىستىرىلىم راسىمىنە قر سىرتقى ىستەر ءمينيسترى ەرلان ىدىرىسوۆ، مادەنيەت جانە سپورت ءمينيسترى ارىستانبەك مۇحامەدي ۇلى، ۇلتتىق وليمپيادا كوميتەتىنىڭ پرەزيدەنتى تەمىرحان دوسمۇحامبەتوۆ قاتىستى.

سالتاناتتى ءراسىمنىڭ سوڭىندا ءسوز العان حالىقارالىق وليمپيادا كوميتەتىنىڭ پرەزيدەنتى توماس باح الماتى قالاسىنىڭ تانىستىرىلىمى جوعارى دەڭگەيدە وتكەنىن اتاپ ءوتىپ، ۇيىمداستىرۋ كوميتەتىنە ريزاشىلىعىن ءبىلدىردى.

ەسكە سالا كەتەيىك، الەمدىك ماڭىزعا يە ايتۋلى سپورت دوداسىن وتكىزۋ ءۇشىن اۋەل باستا الەمنىڭ ون شاقتى ەلى ءوز وتىنىشتەرىن بىلدىرگەن. الايدا، ۋاقىت وتە كەلە كوپشىلىگى وتىنىمدەرىن كەرى قايتارىپ الدى. سوڭىندا ەكى قالا - الماتى مەن قىتاي استاناسى بەيجىڭ قالالارى ۇمىتكەر رەتىندە قالدى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى