ريمدە زورلىق ەكسترەميزمگە قارسى ءىس-قيمىل جونىندەگى كونفەرەنسياسىنىڭ كۇن ءتارتىبى تالقىلاندى
ق ر س ءى م باسپا ءسوز قىزمەتىنىڭ مالىمەتىنشە، ءىس-شارا بارىسىندا اتالعان ماسەلەگە قاتىستى جاھاندىق وڭىرلىك كونفەرەنسيالاردىڭ قورىتىندىلارى جانە الداعى قىركۇيەكتە نيۋ-يوركتە مەملەكەتتەر باسشىلارىنىڭ قاتىسۋىمەن وتەتىن ءسامميتتىڭ كۇن ءتارتىبى تالقىلاندى. قازاقستاندىق دەلەگاتسيانى ق ر س ءى م ەرەكشە تاپسىرمالار جونىندەگى ەلشىسى تيمۋر ورازايەۆ باسقاردى.
قازاقستاندىق تاراپ ءىس-شارا قاتىسۋشىلارىن 29-30- ماۋسىمدا استانادا وتكەن ورتالىق جانە وڭتۇستىك ازيا ەلدەرى بويىنشا وڭىرلىك كونفەرەنسيا تۋرالى حاباردار ەتتى. اتاپ ايتقاندا، وسى تەكتەس قاتەرلەردىڭ وسىمىنە جانە ولاردىڭ لاڭكەستىك ارەكەتتەرگە اۋىسىپ كەتۋىنە ىقپال ەتەتىن جاعدايلارعا جول بەرمەۋگە باعىتتالعان ۇيلەستىرىلگەن ءىس-قيمىلدار ازىرلەۋ جانە ەكسترەميزمگە قارسى ناقتى شارالار تۋرالى ايتىلدى.
دەلەگاتتار ەكسترەميزم مەن لاڭكەستىكتى ءوزارا جاقىن قۇبىلىستار رەتىندە قاراستىرۋ ءجون دەپ، قازىرگى زاماننىڭ وسى باستى عالامدىق قاۋىپ-قاتەرلەرىنە قارسى قيمىلدار ءۇشىن جاۋاپكەرشىلىك ءاربىر مەملەكەتتىڭ موينىندا بولۋ كەرەك دەپ كەلىستى. بۇل قاۋىپ-قاتەرلەرگە قارسى تۇرۋدىڭ بىرلەسكەن قيمىلدارى، سونىڭ ىشىندە لاڭكەستىك ۇيىمداردىڭ جانە ولاردىڭ دەمەۋشىلەردىڭ ءبىرىڭعاي تىزبەسىن جاسالىنۋ قاجەتتىلىگى اتاپ ءوتىلدى.
ماۋسىم ايىندا استانادا جاھاندىق كونفەسسياارالىق جانە مادەنيەتارالىق ديالوگتى نىعايتۋ ماقساتىندا وتكەن الەمدىك جانە ءداستۇرلى دىندەر كوشباسشىلارى V سەزىنىڭ قوسقان ۇلەسى ەرەكشە اتالىپ ءوتتى.
قازاقستاندىق ديپلومات سامميت يدەياسىن قولداپ، وسى سالاداعى ەكسترەميزم مەن لاڭكەستىككە قارسى ىنتىماقتاستىقتى جالعاستىرۋعا ەلىمىزدىڭ دايىندىعىن ءبىلدىردى.
