ينفورماتيكا پانىنەن حالىقارالىق وليمپيادادا قازاقستاندىق وقۋشىلار لايىقتى ونەر كورسەتتى - ا. يگىلىكوۆ

بۇگىن ەكىنشى سوڭعى تۋردىڭ قورىتىندىسىن سارالاي كەلە، ينفورماتيكا پانىنەن حالىقارالىق وليمپيادانىڭ عىلىمي كوميتەتىنىڭ مۇشەسى ارتەم يگىلىكوۆ ءمالىم ەتتى.

«ءبىزدىڭ كوماندا لايىقتى دەڭگەيدە ونەر كورسەتتى دەپ سانايمىن. بۇل بۇعان دەيىنگى حالىقارالىق جارىستارعا قاراعاندا جاقسى ناتيجە. العا جىلجۋشىلىق بار. وقۋشىلارىمىز ءۇش كۇمىس، ءبىر قولا مەدالعا يە بولدى. ال ەندى ەلدەر بويىنشا كوماندالىق ەسەپكە كەلەر بولساق، بۇل جونىندە رەسمي ستاتيستيكا شىعارىلمايتىنىن ەسكەرتەمىن. تەك بەيرەسمي سيپاتتاعى ستاتيستيكا شىعارىلادى. ول ءالى دايىن ەمەس. دەگەنمەن، قازاقستاندىق كوماندا كەم دەگەندە العاشقى جيىرمالىققا ىلىگەدى. جالپى، بۇل وليمپيادادا 12 قاتىسۋشىنىڭ بىرەۋى، ياعني ناقتى ايتار بولساق، 27 وقۋشى التىن مەدالعا ىلىگەيىن دەپ وتىر. ودان ەكى ەسە كوپ، ياعني 54 وقۋشى كۇمىس مەدال الادى، ال 80 دەي وقۋشى قولا مەدالعا قول جەتكىزەدى». - دەدى ا. يگىلىكوۆ.

ايتا كەتەلىك، ازىرگە بەيرەسمي مالىمەتتەرگە سۇيەنسەك، ەلدەر بويىنشا ازىرگە ءبىرىنشى ورىندا وڭتۇستىك كورەيا كومانداسى كەلەدى. ەكىنشى ورىندا - قىتاي، ال رەسەي كومانداسى - ءۇشىنشى ورىندا.

قازاقستان كومانداسى بۇل جولى وندىققا ىلىگىپ، سەگىزىنشى ورىنعا تۇراقتادى.

بۇگىن وليمپيادانىڭ سوڭعى ەكىنشى تۋرى اياقتالدى. وقۋشىلار ءار تۋردا ءۇش تاپسىرمادان ورىندادى. ءار تاپسىرماعا بەرىلەتىن ەڭ جوعارى باعا - 100 بالدى قۇرادى. وڭتۇستىك كورەيالىق وقۋشى دجي حاك يۋن جالعىز ءوزى 600 بال جيناپ، ءابسوليۋتتى ناتيجەگە قول جەتكىزدى.

ەرتەڭ ۇيىمداستىرۋشى كوميتەت وليمپياداعا قاتىسۋشىلاردى الماتى وبلىسىنىڭ تۇرگەن شاتقالىنا الىپ بارادى. وندا ءبىرقاتار مادەني شارالار وتكىزىلەدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى