رەسەيدە اقجارقىن تۇرلىبايدىڭ كەبىن كيگەن بويجەتكەندى ءولىم جازاسىنان قۇتقارۋعا تىرىسۋدا

وتانداستارى ۆەتنامدا ءولىم جازاسىنا كەسىلىپ جاتقان ماريانى قۇتقارىپ قالۋعا تىرىسۋدا.

بۇل تۋرالى Today.kz-كە سىلتەمە جاساپ NUR. KZ حابارلايدى.

بويجەتكەندى ءولىم جازاسىنان امان الىپ قالۋ ءۇشىن ۆكونتاكتە توبىندا ماريانىڭ زاڭدى بۇزبايتىن جاقسى ادام ەكەنىن راستاعىسى كەلەتىن تانىستارىنا سۇراقتارعا جاۋاپ بەرىپ، انكەتا تولتىرۋ باستاماسى قولعا الىنعان.

ساۋالنامادان الىنعان اقپاراتتى جۇيەلەپ، ۆەتنام زاڭىنا سايكەس، ءولىم جازاسىنان قۇتىلۋعا مۇمكىندىك بەرەتىن تولىققاندى مىنەزدەمە رەتىندە ۇسىنۋ جوسپارلانۋدا.

رەسەيلىك ب ا ق 28 جاستاعى ماريا داپيركانىڭ 2014-جىلى حوشيميندە 3 كەلى كوكاين الىپ وتپەكشى بولعان جەرىندە قۇرىقتاعانىن جازعان.

بەلگىلى بولعانداي، بويجەتكەن سوڭعى جىلدارى تايلاندتا تۇرىپ، نيگەريا تۋماسىنا تۇرمىسقا شىعۋعا دايىندالىپ جۇرگەن. جاقىندارى ماريانىڭ ءوزىن فۋتبوليست رەتىندە تانىستىرعان نيگەريالىقتىڭ تۇزاعىنا تۇسكەنىنە سەنىمدى.

«ءار ءتۇرلى سىلتاۋ ايتىپ، ازيا بويىنشا بويجەتكەندەردىڭ سەنىمىنە كىرىپ الادى. اقىرى بايقاتتىرماي، جۇكتەرىنە ەسىرتكىنى سالىپ جىبەرەدى»، - دەلىنگەن ۆكونتاكتە الەۋمەتتىك جەلىسىندە.

الدىن الا مالىمەتتەرگە سايكەس، مارياعا ىشىنەن ەسىرتكى شىققان شاباداندى بولاشاق كۇيەۋى سىيعا تارتقان.

ەسكە سالساق، ءدال سونداي جاعدايدا 20 جاستاعى قازاقستاندىق اقجارقىن تۇرلىباي نيگەريالىق مافيانىڭ قۇربانىنا اينالعان بولاتىن.

بويجەتكەندى گۋانجوۋدا 2014-جىلدىڭ ناۋرىزىندا ەسىرتكىمەن قۇرىقتاپ، كەيىن ءومىر بويىنا باس بوستاندىعىنان ايىرۋ جازاسىن تاعايىندادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى