بالالارعا قارسى جىنىستىق سيپاتتاعى قىلمىس جاساعاندارعا حيميالىق كاستراتسيا جاساۋدى زاڭعا ەنگىزۋ ۇسىنىلدى

بۇگىن استاناداعى ورتالىق كوممۋنيكاتسيالار قىزمەتىندە وتكەن بريفينگتە ىشكى ىستەر مينيسترلىگى اكىمشىلىك پوليتسيا كوميتەتىنىڭ ءبولىم باستىعى اسەت وسپانوۆ وسىلاي ءمالىم ەتتى. بريفينگ قىلمىستىق قاستاندىقتان بالا قۇقىعىن قورعاۋ شارالارىنا ارنالعان بولاتىن.

«بۇگىنگى كۇنى مۇددەلى مەملەكەتتىك ورگاندارمەن بىرلەسە وتىرىپ، ىشكى ىستەر مينيسترلىگى باس پروكۋراتۋرا جانىنداعى جۇمىس توبىندا وسى ماسەلەنى قاراستىرىپ جاتىر. ناقتىراق ايتساق، قىلمىستىق كودەكسكە ونداي قىلمىسقا بارعاندارعا مەديتسينالىق سيپاتتاعى ماجبۇرلەۋ شاراسىن قولدانۋ تۋرالى نورما ۇسىنىلدى»، - دەدى اسەت وسپانوۆ.

ونىڭ ايتۋىنشا، اعىمداعى جىلدىڭ باسىنان بەرى بالالارعا قارسى قىلمىس جاساۋ فاكتىسى ءوسىپ وتىر. ماسەلەن، وتكەن التى ايدا وسىنداي 665 قىلمىس تىركەلگەن، بۇل وتكەن جىلعى وسى كەزەڭمەن سالىستىرعاندا 37 پايىزعا ارتىق.

ايتا كەتەرلىگى، كامەلەتتىك جاسقا تولماعاندارعا قاتىستى جىنىستىق قىلمىس جاساعاندارعا جازانى قاتاڭداتۋ، ولارعا قاتىستى مەديتسينالىق كاستراتسيا قولدانۋ الەمنىڭ ءبىراز ەلىندە، اتاپ ايتقاندا فرانسيا، بەلگيا، پولشا، يزرايلدە قولدانىلۋدا. ال قازاقستاندا سوڭعى ۋاقىتتا بالالارعا قاتىستى زورلىق قىلمىسى ازايماي وتىر.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى