مەكتەپتەردە اي سايىن بالالاردىڭ قاۋىپسىز مىنەز-قۇلقىن قالىپتاستىرۋعا باعىتتالعان ساباقتار وتەدى

بۇگىن استاناداعى ورتالىق كوممۋنيكاتسيالار قىزمەتىندە وتكەن بريفينگتە ءبىلىم جانە عىلىم مينيسترلىگى بالالار قۇقىعىن قورعاۋ كوميتەتىنىڭ باس ساراپشىسى ەرجان جيرەنباي وسىلاي ءمالىم ەتتى.

بريفينگ قىلمىستىق قاستاندىقتان بالا قۇقىعىن قورعاۋ شارالارىنا ارنالعان بولاتىن.

«جاڭا وقۋ جىلى باستالماي تۇرىپ، مينيسترلىك تاراپىنان بارلىق جەرگىلىكتى اتقارۋشى ورگاندارعا نۇقساۋلىق حات جولداندى. وندا بىرىنشىدەن، ءبىلىم بەرۋ مەكەمەلەرىن مەكتەپ پسيحولوگتارىمەن، الەۋمەتتىك پەداگوگتارمەن تولىق قامتاماسىز ەتۋ ماسەلەسى قويىلىپ وتىر. ەكىنشىدەن، جاڭا وقۋ جىلىنان باستاپ ءاربىر ايدىڭ سوڭعى اپتاسىندا سىنىپ ساعاتتارى شەڭبەرىندە بالالاردىڭ قاۋىپسىز مىنەز-قۇلقىن قالىپتاستىرۋعا باعىتتالعان پروفيلاكتيكالىق ساباقتار وتكىزۋ مىندەتتەلەدى»، - دەدى مينيسترلىك ساراپشىسى.

ونىڭ ايتۋىنشا، ءبىلىم جانە عىلىم مينيسترلىگى بالالارعا قاتىستى ءناپسىقۇمارلىق، زورلىق فاكتىلەرىنىڭ كوبەيۋىنە بايلانىستى قىلمىستىق زاڭ بۇزۋشىلىقتاردىڭ الدىن الۋ جونىندەگى 2015-2017-جىلدارعا ارنالعان ءىس-قيمىل جوسپارى بەكىتىلگەن. سونىمەن قاتار، ءبىلىم بەرۋ مەكەمەلەرىندەگى وقۋشىلار مەن تاربيەلەنۋشىلەر اراسىنداعى قۇقىق بۇزۋشىلىقتارىنىڭ الدىن الۋ، دەنە مەن پسيحولوگيالىق ساۋلىقتى نىعايتۋ، حالىقارالىق تاجريبەلەرگە سايكەس، ەلىمىزدەگى زاڭنامالاردى جەتىلدىرۋ كوزدەلەدى.

ال ىشكى ىستەر مينيسترلىگىنىڭ وكىلى اسەت وسپانوۆتىڭ سوزىنە قاراعاندا، الداعى ۋاقىتتا بالالاردى قىلمىستان قورعاۋدىڭ پروفيلاكتيكالىق شارالارىن جۇزەگە اسىرۋ جوسپارلانباق. سونىڭ ءبىرى - پسيحولوگتاردى قاتىستىرا وتىرىپ، مەكتەپ وقۋشىلارىنىڭ اراسىندا پسيحولوگيالىق تەست الۋ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى