قىتايلىق جانە سينگاپۋرلىق كومپانيالار الماتى تۇبىنەن جاڭا اۋەجاي سالۋدى ۇسىنۋدا

بۇل تۋرالى «قازاقپارات» اگەنتتىگىنىڭ رەسمي ساۋالىنا بەرگەن جاۋابىندا ق ر ينۆەستيتسيا جانە دامۋ مينيسترلىگى حابارلادى.

«قازاقستاننىڭ ەكى نەگىزگى الەمدىك نارىقتىڭ ورتاسىندا ورنالاسۋى 66 قادامدا («100 قادام» ۇلت جوسپارى) ايتىلعان اۆياتسيالىق حابتىڭ قۇرىلۋىن تالاپ ەتەدى. وعان الماتىدا تيىستى ينفراقۇرىلىمى بار جاڭا اۋەجايدى سالۋ ارقىلى قول جەتكىزۋ جوسپارلانىپ وتىر. بۇل باعىتتا جۇمىستار باستالدى. بۇگىندە ءۇش ينۆەستوردىڭ: قىتايلىق «تەنگري حولدينگ»، سينگاپۋرلىق «Changi Airports International Ltd» جانە فرانسۋزدىق «Vinci Group» كومپانيالارىنىڭ ۇسىنىستارى قارالدى»، - دەلىنگەن «قازاقپارات» اگەنتتىگىنە بەرىلگەن جاۋاپتا.

مينيسترلىكتىڭ اتاپ كورسەتىلگەنىندەي، «تەنگري حولدينگ» پەن «Changi Airports International Ltd» جاڭا اۋەجايدىڭ جوباسىن ۇسىنسا، فرانسۋزدىق «Vinci Group» كومپانياسى قولدا بار اۋەجايدى كەڭەيتۋ بويىنشا جوبانى ۇسىنۋدا. ينۆەستورلار نەگىزگى تالاپ رەتىندە سالىق ساياساتىن جەڭىلدەتۋدى، قاجەتتى ينفراقۇرىلىمدى رەسپۋبليكالىق بيۋجەت ەسەبىنەن سالۋدى جانە جەر ۋچاسكەسىن ءبولۋدى سۇراپ وتىر.

«ينۆەستيتسيالىق ۇسىنىستار الدىن الا قاراستىرۋدان وتكەن سوڭ، جوبانىڭ ستراتەگيالىق ماڭىزدىلىعى مەن جوعارى قۇنىن ەسكەرە وتىرىپ، ەڭ تيىمدى ۇسىنىستى انىقتاۋ ءۇشىن شەتەلدىك كەڭەسشىلەر تارتىلدى»، - دەپ جازىلادى حابارلامادا.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى