الماتىلىق كاسىپكەر تۇيە جۇنىنەن كيىم تىگۋدى جوسپارلاپ وتىر

ساۋلە بايتىلەسوۆا ءوزىنىڭ بيزنەس جوسپارىن الماتى قالالىق كاسىپكەرلەرگە قىزمەت كورسەتۋ ورتالىعىندا جاسادى. كاسىپكەر ورتالىق قىزمەتكەرلەرىنىڭ جۇمىسىنا ءدان ريزا.

ساۋلە ءوز كاسىبىن جامبىل وبلىسىندا تون تىگۋ سەحىندا قاتارداعى جۇمىسكەر بولىپ باستاعان. ول كەزدە قازاقى تونعا سۇرانىس وتە جوعارى بولعان. كەيىن قىتايدان ارزان تاۋار كەلە باستاعاندا سەح جابىلىپ، ساۋلە ءۇش بالاسىمەن الماتىعا كەلەدى.

الماتىدا ول اپكەلەرىمەن قوسىلىپ كىشىگىرىم اتەلە اشقان. ماڭداي تەر، قاجىرلى ەڭبەكتىڭ ارقاسىندا ولار «ءبيبىحان» برەندىن قالىپتاستىردى.

2004 -جىلى مەملەكەت جەر تەلىمىن بەرگەن. بۇل جەر تەلىمىندە كاسىپكەر بولاشاقتا سەح سالۋدى جوسپارلاپ وتىر. وسى ماقساتتا ول «دامۋ» كاسىپكەرلىكتى قولداۋ قورىنىڭ كومەگىمەن جىلدىق ءوسىمى %6 بولاتىن 30 ميلليون تەڭگە كولەمىندە نەسيە الدى.

«الماتىدا كاسىپكەرلەرگە قىزمەت كورسەتۋ ورتالىعى اشىلعانىن ەستىپ، وسىندا كەلدىم. مۇندا قاجەتتى زاڭ، بۋحگالتەرلىك، سالىقتىق كەڭەس الدىم. بيزنەس- جوسپارىم قابىلداندى. ەندى اتەلەمدى كەڭىتىپ، سەح سالامىن. ءبىز 2 ديزاينەردى شاقىردىق. ىسكەرلىك ستيلدەگى كيىمدەر تىگۋگە باسىمدىق بەرەمىز. تابيعي شيكىزاتتان تابيعي ونىمنەن تىگەمىز»، - دەدى ساۋلە بايتىلەسوۆا.

كاسىپكەر قوسىمشا 20 ادامدى جۇمىسپەن قامتىماق.

«قازاقتىڭ بايتاق جەرىنىڭ بەرەرى كوپ. سونى ەبىن تاۋىپ پايدالانا ءبىلۋىمىز كەرەك. قازىر قازاقستاندا تۇيە ءجۇنى بوسقا ورتەلىپ جاتىر. مەن كورمەلەردىڭ بىرىندە موڭعوليالىق كاسىپكەرلەردىڭ تۇيە جۇنىنەن تىككەن كيىمىن كورىپ تاڭ قالدىم. سونداي بايلىقتى دالاعا شاشقانشا ەلگە دە وزىمە دە پايدالى ءىس اشسام دەپ ارماندايمىن»، - دەدى ول.

وسى ماقساتتا ول موڭعولياعا بارىپ ءوندىرىس جۇمىسىمەن تانىسىپ قايتپاقشى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى