باسپانالى بولۋ - ءبىر باقىت
بۇل ورايدا قازاقستاندىقتاردىڭ كوڭىلىنە «قول جەتىمدى باسپانا - 2020» باعدارلاماسى كادىمگىدەي ءۇمىت سىيلاعانىن ايتا كەتكەن ءجون.
اتالعان باعدارلامانىڭ ەلىمىزدىڭ ءۇشىنشى قالاسى - شىمكەنتتە ورىندالۋى ەلىمىزدىڭ وزگە وڭىرلەرىنە ۇلگى بولعانداي. ماسەلەن، وسى باعدارلاما اياسىندا شىمكەنتتە وتكەن جىلى عانا 46 تۇرعىن ءۇيدىڭ قۇرىلىسى جۇرگىزىلىپ، جالپى اۋدانى 26697,2 شارشى مەتردى قۇرايتىن 8 تۇرعىن ءۇي پايدالانۋعا بەرىلدى. بۇگىنگى تاڭدا 2915 پاتەرلى قالعان 38 تۇرعىن ءۇيدىڭ قۇرىلىسى جۇرگىزىلۋدە. دەمەك، تاياۋ ارادا تاعى دا 2915 شىمكەنتتىك قونىس تويىن تويلايدى دەگەن ءسوز!
ءبىز جوعارىدا ايتقان 8 ءۇيدىڭ بىرەۋى - ارەندالىق تۇرعىن ءۇي. 63 پاتەرلى بۇل ءۇيدىڭ جالپى اۋدانى - 4226,5 شارشى مەتر. بۇل ءۇي وسى جىلدىڭ مامىرىندا پايدالانۋعا بەرىلدى. قالعان 7 ءۇي كەشەگى ماۋسىم ايىنىڭ ورتاسىندا «تۇرعىن ءۇي قۇرىلىس جيناق بانكى» جۇيەسى ارقىلى يەلەرىنە تابىس ەتىلدى.
- ءبىز ۇلكەن ومىرگە ەندى جولداما العان جاس وتباسىلاردى سوزبەن ەمەس، ىسپەن قولداۋعا ءتيىسپىز. ۇلكەندەر سەكىلدى ولاردىڭ دا ءوز باسپانالارى بولۋى ءۇشىن ەڭبەكتەنۋىمىز كەرەك. سوندىقتان دا تەك جاس وتباسىلارعا ارناپ، 216 پاتەرلى تۇرعىن ءۇيدىڭ قۇرىلىسىن باستادىق. بۇل ءۇي دە كوپ كەشىكپەي پايدالانۋعا بەرىلەدى، - دەيدى شىمكەنت قالاسىنىڭ اكىمى دارحان ساتىبالدى.
بۇدان بولەك، بۇل كۇندەرى شىمكەنتتەگى جاڭا اكىمشىلىك- ىسكەرلىك ورتالىعىندا سالىنىپ جاتقان ەكى تۇرعىن ءۇيدىڭ قۇرىلىسى بىتۋگە تاياۋ. قۇرىلىسشىلار ونى جىل اياعىنا دەيىن تاپسىرامىز دەپ وتىر.
جىل اياعىنا دەيىن تاپسىرىلاتىن ۇيلەردىڭ سانى مۇنىمەن دە بىتپەيدى. جەرگىلىكتى بيلىك جالپى اۋدانى 104440,68 شارشى مەتر بولاتىن جيىرمادان اسا تۇرعىن ءۇيدى جەلتوقسان ايىنىڭ اياعىنا دەيىن ءبىتىرۋ ءۇشىن بار كۇش- جىگەردى جۇمىلدىرۋدا. راس، بۇل ۇيلەردىڭ بارلىعى دا تۇرعىندارعا جالعا بەرىلەدى.
ءبىر سوزبەن ايتقاندا، شىمكەنتتە قاربالاس تىرلىك. ۇلكەندەر جاعى «تۇرعىن ۇيلەر كەشەگى كەڭەس وكىمەتىنىڭ كەزىندە دە مۇنداي قارقىنمەن سالىنباۋشى ەدى» دەيدى. ەندەشە، مۇنداي تىرلىككە تەك قۋانا ءبىلۋ كەرەك قوي.
سەرعالي بالاجان
Baq.kz
