ىلە اكىمىنىڭ كومەكشىسى قاماۋعا الىندى
سوتتىڭ باسپا ءسوز قىزمەتىنىڭ حابارلاۋىنشا، م. جۇماعۇلوۆ قىلمىستىق كودەكستىڭ 366-بابىنىڭ 2-بولىمىمەن (ىرى كولەمدەگى پارا الۋ) قاراستىرىلعان قىلمىستىق قۇقىق بۇزۋشىلىقتى جاساعانىندا كۇدىكتى تانىلىپ وتىر.
سوت جەدەل- ىزدەۋ شارالارىن وتكىزۋ كەزىندە ىلە اۋدانى اكىمىنىڭ كومەكشىسى م. جۇماعۇلوۆ ىلە اۋدانى اكىمدىگىنىڭ باس مامانى ا. ارقىلى ك. ەسىمدى ازاماتتان بايسەركە اۋىلدىق وكرۋگىندە ورنالاسقان كوممەرتسيالىق نىساننىڭ جەر ۋچاسكەسىنىڭ نىسانالى ماقساتىن وزگەرتۋى ءۇشىن 15000 دوللار كولەمىندە پارا العانىن انىقتادى.
«م. جۇماعۇلوۆتىڭ زاڭمەن 7 جىلعا باس بوستاندىعىنان ايىرۋ جازاسى قاراستىرىلىپ وتىرعان قۇقىق بۇزۋشىلىقتى جاساعانىندا كۇدىكتى تانىلۋىن ەسەپكە العان سوت ونىڭ بوستاندىقتا ءجۇرىپ، تەرگەۋ مەن سوت ورگاندارىنان جاسىرىنا الاتىنىن، ءىستىڭ وبەكتيۆتى تەرگەلۋىنە قارسىلىق تانىتا الۋىن ەسەپكە الىپ، وعان قاتىستى قاماۋعا الۋ تۇرىندەگى بۇلتارتپاۋ شاراسىن قولداندى»، - دەپ ءتۇسىندىردى باسپا ءسوز قىزمەتىنەن.
ەسكە سالا كەتەيىك، الماتى وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ الماتى وبلىسى بويىنشا دەپارتامەنت قىزمەتكەرلەرى ىلە اۋدانى وتەگەن كەنتىندە «الماتى- قاپشاعاي» كۇرە جولىندا پارا الىپ جاتقان كەزدە ىلە اۋدانى اكىمىنىڭ كومەكشىسى م. جۇماعۇلوۆ پەن اۋدان اكىمدىگىنىڭ كاسىپكەرلىك ءبولىمىنىڭ باس مامانى ف. ەرقوجانوۆتى ۇستاعان بولاتىن.
