سوت الماتى مەتروسىنىڭ بۇرىنعى ديرەكتورىنىڭ مۇلكىن تاركىلەدى

بۇل تۋرالى بۇگىن الماتى قالالىق سوتىنىڭ باسپا ءسوز قىزمەتىنەن حابارلادى.

سوت مۇرات وكشەبايەۆتىڭ جانە ونىڭ وتباسى مۇشەلەرىنىڭ مۇلىكتەرىن تاركىلەدى. دالىرەك ايتقاندا، ءتورت پاتەر تاركىگە الىندى - ولاردىڭ ەكەۋى استانادا، ەكەۋى الماتىدا ورنالاسقان. سونىمەن قاتار الماتىداعى ءبىر جەر تەلىمى، ءبىر گاراج جانە ءبىر ەسكى Toyota Highlander اۆتوكولىگى دە تاركىگە الىندى.

سونداي-اق سوت ارقىلى مۇرات وكشەبايەۆقا قاتىستى ەكى ايعا، ياعني ۇستىمىزدەگى جىلدىڭ 14- شىلدەسىنەن 14- قىركۇيەگىنە دەيىن قاماۋعا الۋ جونىندە بۇلتارتپاۋ شاراسى قولدانىلدى.

مۇرات وكشەبايەۆ قىلمىستىق كودەكستىڭ (1997 ج) 176-بابىنىڭ 4- تارماعى بويىنشا (سەنىپ تاپسىرىلعان بوتەن مۇلىكتى يەلەنىپ الۋ نەمەسە ىسىراپ ەتۋ) قىلمىس جاساعاندىعى رەتىندە كۇدىكتى دەپ تانىلدى. ول مۇلكى تاركىلەنىپ، بەس جىلدان ون جىلعا دەيىن باس بوستاندىعىنان ايىرىلۋى مۇمكىن.

مۇرات وكشەبايەۆ 1994 -جىلدان 2010 -جىلعا دەيىن «الماتى مەتروقۇرىلىس» ا ق باس ديرەكتورى بولىپ جۇمىس اتقاردى. 2010 -جىلدان 2014 -جىلعا دەيىن «مەتروپوليتەن» ك م ك باسقاردى. 62 جاستا، تەحنيكا عىلىمدارىنىڭ دوكتورى. حالىقارالىق اقپاراتتاندىرۋ اكادەمياسىنىڭ اكادەميگى، ق ر ۇلتتىق ينجەنەرلىك اكادەمياسىنىڭ كوررەسپوندەنت- مۇشەسى.

2009 -جىلى مۇرات وكشەبايەۆ ءۇي قاماعىنا الىنعانى بەلگىلى. سول كەزدە وعان مەترو قۇرىلىسىنا باعىتتالعان 120 ميلليون تەڭگەنىڭ ماقساتسىز جۇمسالعاندىعى بويىنشا ايىپ تاعىلعان ەدى.

ودان باسقا، بۇل ءىس بويىنشا ونىڭ بىرنەشە ارىپتەسىنە دە ايىپ تاعىلدى.

سول كەزدە الماتى قالاسى اكىمى احمەتجان ەسىموۆتىڭ مالىمدەگەنىندەي، ءۇي قاماعىنا قارجىنىڭ ماقساتسىز جۇمسالعاندىعى سەبەپ بولعان. بۇل قاراجات ەرىكتى ساقتاندىرۋعا جۇمسالعان. ودان باسقا، قارجىلىق قۇجاتتاردى راسىمدەۋدە دە قاتەلىكتەر جىبەرىلگەن. دەگەنمەن، كوپ ۇزاماي وكشەبايەۆ ءوز قىزمەتىنە قايتا ورالعان بولاتىن.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى