عارىشتا قازاقستان عىلىمى ءۇشىن ءبىرقاتار تاجىريبەلەر جۇرگىزىلەتىن بولادى - ە. شايماعامبەتوۆ
بۇل تۋرالى بۇگىن الماتىدا جۋرناليستەرمەن بولعان كەزدەسۋدە ق ر ينۆەستيتسيالار جانە دامۋ مينيسترلىگىنىڭ اەروعارىش كوميتەتى ءتوراعاسىنىڭ ورىنباسارى ەركىن شايماعامبەتوۆ ءمالىم ەتتى.
«قازىر وتاندىق عىلىمي باعدارلاما «رەسەيعارىش» فەدەرالدىق عارىش اگەنتتىگى تاراپىنان ماقۇلدانىپ جاتىر. زەرتتەۋلەردىڭ نەگىزگى باعىتتارىنا كەلەر بولساق، ءبىرىنشى كەزەكتە عارىشتىق مونيتورينگ جاساۋ، ياعني ارال تەڭىزىنىڭ، كاسپي تەڭىزىنىڭ، شاڭدى داۋىلداردىڭ جانە مۇنايدان لاستانعان اۋماقتاردىڭ احۋالىن باقىلاۋ شارالارى جۇرگىزىلەدى. سونىمەن قاتار بيوتەحنولوگيا جانە بيومەديتسينا سالالارى بويىنشا زەرتتەۋلەر جۇزەگە اسىرىلادى. دالىرەك، عارىشتىق ۇشۋ ساپارىنىڭ عارىشكەرگە اسەرى جانە باسقا دا فيزيكا- تەحنيكالىق زەرتتەۋلەر جۇرگىزىلەدى. ءبىزدىڭ عالىمدار ءقازىر بۇل سالالاردا ءار ءتۇرلى ادىستەمەلەر ازىرلەگەن. ال ولاردىڭ ساپاسى وسى حالىقارالىق عارىش ستانساسىندا انىقتالادى»، - دەدى ەركىن شايماعامبەتوۆ.
ول سونىمەن قاتار بۇل عىلىمي باعدارلامالاردى «عارىشتىق زەرتتەۋلەر مەن تەحنولوگيالار ۇلتتىق ورتالىعى» ا ق ءال- فارابي اتىنداعى قازاق ۇلتتىق ۋنيۆەرسيتەتى جانە ادام جانە جانۋارلار فيزيولوگياسى ينستيتۋتىمەن بىرلەسىپ ازىرلەگەندىگىن ايتتى. ءقازىر اتالمىش ورتالىقتا تەحنيكالىق تاپسىرمالاردى ماقۇلداۋ جۇمىستارى جۇرگىزىلىپ جاتىر ەكەن.
«ەكسپو-2017 حالىقارالىق كورمەسى قارساڭىندا ءبىز عارىشتا ءبىرقاتار شارالاردى جۇزەگە اسىرۋدى جوسپارلاپ وتىرمىز. ونىڭ ۇستىنە بۇل ۇشۋ ساپارى قازاق حاندىعىنىڭ 550 جىلدىعىن تويلاۋ شارالارىمەن سايكەس كەلىپ وتىر. سوندىقتان عارىشكەرىمىز ايدىن ايىمبەتوۆ حالىقارالىق عارىش ستانساسىنان كۇللى الەمگە قازاقستاندا بولىپ جاتقان يگى شارالار جايىندا اڭگىمەلەيتىن بولادى»، - دەدى ە. شايماعامبەتوۆ.
اۆتور: جاپپاربەرگەن ايبوتا
