ەلەكتروندىق تەحنولوگيا قانشا دامىعانىمەن ۋاقىت وتە كەلە الەم كىتاپ وقۋعا قايتا دەن قويادى - ءا. اسقاروۆ

بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ر ۇلتتىق كىتاپحاناسىنىڭ ديرەكتورى الىبەك اسقاروۆ وسىنداي پىكىر ءبىلدىردى. ەسكە سالا كەتەيىك، بريفينگ «ەلدىڭ تاريحى مەن مادەنيەتى - بولاشاعى تۇتاس ۇلت» تاقىرىبىندا وتكەن بولاتىن.

«ءبىزدىڭ ۇلتتىق كىتاپحاناعا كەلەتىندەر سانى جىلىنا ەكى ميلليون وقىرماننان اسادى. ولاردىڭ ىشىندە «ۆيرتۋالدى وقىرمان» ميلليونعا جۋىق. كەلۋشىلەردىڭ 12,5 پايىزى - عالىمدار، 5,5 پايىزى - قىزمەتكەرلەر، 77 پايىزى - ستۋدەنتتەر، ال 5 پايىزىن باسقا ساناتتاعىلار قۇرايدى»، - دەيدى الىبەك اسقاروۆ.

ونىڭ ايتۋىنشا، سوڭعى جىلدارى كىتاپحاناعا كەلۋشىلەر سانىنىڭ تومەندەۋ ءۇردىسى بايقالىپ وتىر. بۇل ەلەكتروندىق تەحنولوگيالاردىڭ دامۋىمەن بايلانىستى بولسا كەرەك. ويتكەنى، قازىرگى تاڭدا ۋاقىتتى ۇنەمدەگىسى كەلەتىندەر كىتاپتى ينتەرنەتتىڭ كومەگىمەن ايفون، پلانشەت، كومپيۋتەرلەر ارقىلى وقۋعا كوشىپ بارادى.

«الايدا، ءتورت تومنان تۇراتىن «سوعىس جانە بەيبىتشىلىك» رومانىن ايفوننان نەمەسە پلانشەتتەن وقۋ مۇمكىن ەمەس، ول ادامدى سوقىر ەتەدى. سوندىقتان دا، ۋاقىت وتە كەلە الەم ءداستۇرلى كىتاپ وقۋ ۇدەرىسىنە قايتا دەن قويادى دەپ ويلايمىن»، - دەدى الىبەك اسقاروۆ.

بۇدان بولەك، ۇلتتىق كىتاپحانا باسشىسى كىتاپحانا سالاسىنداعى كادر ماسەلەسىنە دە نازار اۋدارتتى. ونىڭ ايتۋىنا قاراعاندا، قازىرگى تاڭدا قازاقستانداعى كىتاپحاناشىلاردىڭ سانى 18826 ادامدى قۇرايدى. جالپىعا ورتاق كىتاپحانالاردا 9281 ادام جۇمىس ىستەسە، ولاردىڭ 2790 ى نەمەسە 30 پايىزى وسى سالانىڭ جوعارى ءبىلىمدى، ال 3051 ءى ورتا ءبىلىمدى ماماندارى.

«ياعني، كىتاپحانادا جۇمىس ىستەپ جۇرگەندەردىڭ 62 پايىزى ءوز ماماندىعى بويىنشا قىزمەت ەتىپ جاتىر. الايدا، ولاردىڭ رەسپۋبليكاداعى ورتاشا ايلىق جالاقىسى 42 مىڭ تەڭگەنى قۇرايدى»، - دەيدى ءا. اسقاروۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى