باۋىرجان ابدىشيەۆ سەرىك احمەتوۆكە قىسىمعا شىداماعاندىقتان جالا جاپقان
تەلەارنا تىلشىلەرىنىڭ مالىمەتىنشە، قاراعاندى وبلىسىنىڭ بۇرىنعى اكىمى مۇنى قىسىمعا شىداماي جاسادىم دەپ وتىر. سوندىقتان بۇگىن ول سۋديادان تەرگەۋ كەزىندە بەرگەن جاۋاپتارىنىڭ كۇشىن جويۋدى سۇرادى.
باۋىرجان ابدىشيەۆتىڭ ايتۋىنشا، تەرگەۋشىلەر ونى شاقىرىپ الىپ، ەكس-پرەمەر سەرىك احمەتوۆكە قارسى بىرنەشە ەپيزود بويىنشا جالا جابۋدى تالاپ ەتكەن. ايتپەسە، ءوزىڭنىڭ جاعدايىڭ مۇشكىل بولادى دەپتى.
سەرىك احمەتوۆ تە وزىنە قاتىستى قوزعالعان قىلمىستىق ءىستى مۇلدەم توقتاتۋدى سۇراپ وتىر. ويتكەنى، تاعىلعان ايىپتاردا قىلمىس قۇرامى جوق دەپ ەسەپتەيدى. سونىمەن قاتار، ەكس-پرەمەر مەملەكەتكە كەلتىرىلگەن شىعىن كولەمىن 1 ميلليارد تەڭگەدەن ازايتۋدى ءوتىندى. وسى قىرۋار قارجىنىڭ تەڭ جارتىسىن، ياعني 430 ميلليون تەڭگەنى ەكس-پرەمەردىڭ اعاسى - «ستال-تسينك» كومپانياسىنىڭ باسشىسى بەرىك احمەتوۆ بيۋدجەتكە قايتارىپ بەرگەن بولاتىن. سوندىقتان ادۆوكاتتار وسى جەكە مەكەمەگە قاتىستى ەپيزودتى دوعارۋدى تالاپ ەتتى.
بۇعان دەيىن قازاقستاننىڭ بۇرىنعى پرەمەر-ءمينيسترى سەرىك احمەتوۆتىڭ ءىسى بويىنشا سوتتالۋشىلار وزدەرىنىڭ بۇلتارتپاۋ شاراسىن وزگەرتىپ، قاماۋدان بوساتۋدى تالاپ ەتكەن بولاتىن. قاراعاندى وبلىسىنىڭ بۇرىنعى اكىمى باۋىرجان ابدىشيەۆتىڭ ادۆوكاتتارى وعان قولدانىلعان بۇلتارتپاۋ شاراسىن وزگەرتۋدى سۇرادى، سەبەبى ولار ايىپتالۋشىنى بۇدان ءارى قاماۋدا ۇستاۋعا نەگىز جوق دەپ ەسەپتەيدى. پروكۋرورلاردىڭ سوزىنە قاراعاندا، ءوتىنىشتى كۋاگەرلەردىڭ بارلىعىنان تۇسىنىك الىنىپ، ءىس ماتەريالدارى تولىق زەرتتەلگەننەن كەيىن عانا قاناعاتتاندىرۋ مۇمكىن بولادى.
ايتا كەتەيىك، قازاقستاننىڭ بۇرىنعى ءمينيسترى سەرىك احمەتوۆكە جەمقورلىق ماندەگى التى قىلمىس بويىنشا رەسمي تۇردە ايىپ تاعىلعان بولاتىن، ولاردىڭ قاتارىندا اسا ءىرى كولەمدە پارا الدى (تەرگەۋدىڭ تۇجىرىمىنشا، 2 ميلليون 400 مىڭ دوللار - اۆت.)، اسا ءىرى كولەمدە بيۋدجەت قارجىسىن جىمقىردى، لاۋازىمىن اسىرا پايدالاندى جانە كاسىپكەرلىك قىزمەتكە زاڭسىز ارالاستى دەگەن ايىپتار بار.
سەرىك احمەتوۆ 2014-جىلى قاراشادا قاماۋعا الىندى. وعان قاتىستى ءۇي قاماۋىنا الۋ بۇلتارپاۋ شاراسى قولدانىلدى.
سونىمەن قاتار، سەرىك احمەتوۆتىڭ اعاسى كەلتىرىلگەن شىعىننىڭ وتەمى رەتىندە مەملەكەتكە 430 ميلليون تەڭگەنى (2,29 ميلليون دوللار) قايتارعانى بەلگىلى. الايدا احمەتوۆتىڭ ءوزى دە، ءىس بويىنشا كۋاگەر بولعان اعاسى دا مەملەكەتكە شىعىن كەلگەنىن مويىندامادى. احمەتوۆتىڭ مەملەكەتكە كەلتىرگەن شىعىنىنىڭ جالپى سوماسى، تەرگەۋ تۇجىرىمى بويىنشا، 1,2 ميلليارد تەڭگەگە (6,4 ميلليون دوللار) تەڭ.
