الماتىلىقتار جۇدىرىقتاي جۇمىلدى
ويتكەنى، الماتىلىقتار بيلىكتىڭ كومەگىنە قاراپ وتىرماي، وزدەرى دە قولدارىنا كۇرەك الىپ، جەرلەستەرىنە كومەك بەرۋگە كىرىسىپ كەتتى.
سەل سالدارىنان 7 كوپىر مەن جاياۋ جۇرگىنشىلەر جولى ءبۇلىنىپ، ءبىر كوپىر اپاتتىق جاعدايعا ۇشىرادى. 100 دەن استام ءۇيدى سۋ شايىپ كەتتى. 900 جۋىق ادام اپات ايماعىنان كوشىرىلدى. العاشقى كۇننەن تۇرعىندارعا 1748 ادام (اسكەري قىزمەتكەرلەر، قۇتقارۋشىلار، اكىمدىك قىزمەتكەرلەرى) ، 308 تەحنيكا جانە 3 تىكۇشاق كومەككە كەلدى. سوسىن الەۋمەتتىك جەلى قولدانۋشىلارى ءوز پاراقشالارىندا ۇندەۋ تاستاپ، حالىقتى سوزبەن ەمەس، ىسپەن قولداۋ كورسەتۋگە شاقىردى. وسىلايشا سۋ استىندا قالعان قاراعايلى اۋىلىنداعى كومەك بەرۋشى ۆولونتەرلەر سانى 600 ادامنان استى. ولار قۇتقارۋشىلاردىڭ اياعى جەتە قويماعان اۋماقتارداعى ۇيلەرگە بارىپ، اۋلالارىن تازالاۋعا قول ۇشىن بەردى.
ءبىر قىزىعى - سودان كەيىن بۇل ساۋاپتى ىسكە مەيرامحانالار ارالاسا باستادى. ولار ۆولونتەرلەر مەن قۇتقارۋشىلاردى تەگىن تاماقتاندىرۋدا. «رۋمي» مەيرامحاناسىنىڭ قوجايىنى قۋانىش شونباي فەيسبۋكتەگى پاراقشاسىندا قايىرىمدى ءىستىڭ قالاي باستالعانىن بىلاي بايانداپتى: «بارلىعى فەيسبۋكتەگى ءبىر قىزدىڭ سەلدەن زارداپ شەككەندەرگە اس- اۋقاتپەن كومەك بەرۋگە شاقىرعان سوزدەرىنەن باستالدى. وزگەنىڭ قايعىسىنا نەمقۇرايدى قاراي المايتىن ازامات رەتىندە قولدان كەلگەنشە جاردەمدەسۋگە شەشىم قابىلدادىق. ياعني، العاشقى 100 ادامدى پالاۋمەن تاماقتاندىردىق. سودان كەيىن وسىنى پاراقشامىزدا جاريالاعان ەدىك، 2800 ادام لايك باسىپ، قولدادى. سونى ەسكەرىپ، فوتو جانە ۆيدەوەسەپ جاساپ، باسقالاردى دا ءۇن قوسۋعا شاقىردىق. ەرتەڭىندە- اق ءبىزدى كوپتەگەن مەيرامحانالار قولدادى. وسىلايشا ءبىز بۇگىن 1325 ادامدى اس- اۋقاتپەن قامتىدىق، ەرتەڭ بۇل كورسەتكىشتى 2000 ادامعا جەتكىزەمىز» .
سونداي- اق، بۇل جۇمىستار قىزىل اي قوعامىنىڭ جەتەكشىلىگىمەن جۇرگىزىلىپ جاتقانىن اتاپ ءوتۋ كەرەك. زارداپ شەككەندەرگە قارجىلىق كومەك كورسەتەم دەۋشىلەرگە ارنايى ەسەپشوت اشىلعان. ەرىكتىلەر ونداعى جينالىپ جاتقان اقشاعا ءالى تيىسپەيمىز دەپ وتىر. «ويتكەنى، كەي تۇرعىنداردىڭ ۇيلەرى راسىمدەلمەگەن، سوندىقتان، مەملەكەت ونداي قۇرىلىستار ءۇشىن وتەماقى بەرە المايدى. سول كەزدە جينالعان قارجىنى اجەتكە جاراتۋعا ابدەن بولادى. اقشامەن جانە قول كۇشىمەن كومەك بەرە الماعاندار جاي عانا كۇرەك، رەزەڭكە ەتىك، سىرىڭكە مەن مايشام اكەلسە دە جەتەدى» ، - دەيدى قىزىل اي قوعامىنىڭ وكىلى رۋسلان حرۋشيەۆ (informburo.kz) .
دەگەنمەن، جاقسى ىستەن جاماندىقتى كورۋگە ۇمتىلىپ تۇراتىن ادامدار الەۋمەتتىك جەلىدە از ەمەس. سوندىقتان، كەي قولدانۋشىلار ەرىكتىلەردىڭ جۇمىس ساتىندەگى سۋرەتتەرىن الەۋمەتتىك جەلىلەرگە سالعانىن تىم ەرسى كورىپ، تاعى ءبىر داۋرىعىپ قالدى. الايدا، وعان نەگىز بار ما؟ سۋرەتىن سالعانى - باسقالاردى دا بوس جاتپاي، وسى ىسكە ۇندەگەنى ەمەس پە؟ بالكىم، ارتىق كەتكەن ادامدار دا بار شىعار. ءبىراق بارلىعى سول سۋرەتتى قابىلداۋشى ادامنىڭ وزىنە بايلانىستى. جاقسىلىققا ۇمتىلعان ىزگى ادام ودان ماقتانگەرشىلىك پەن ارزان پياردى ەمەس، جەرلەسىنە قولدان كەلگەن جاردەمىن بەرۋگە اسىققان قايىرىمدى جاننىڭ بەينەسىن كورەر ەدى، بىزدىڭشە. بىرەۋلەر الەۋمەتتىك جەلىدە بەلسەندى الماتىلىقتاردىڭ سۋرەتىن سوگىپ، جامانداپ وتىرعاندا، ولار بۇگىن دە سەلدەن زارداپ شەككەن ۇيلەردىڭ اۋلالارىن بالشىقتان تازارتىپ ءجۇر.
