الماتىداعى سايران كولى زاماناۋي دەمالىس ورنىنا اينالادى
قالا اكىمى احمەتجان ەسىموۆ اباتتاندىرىلعان جاعاجايدى ارالاپ، دايىندىقپەن تانىستى.
دەمالۋشىلاردىڭ كوپشىلىگى كول جاعاسىنا قۇمار. وسى ماقساتتا الماتىدا اپتاپ ىستىقتا جانعا سايا بولار ورىندار سانى ارتىپ كەلەدى.
بۇگىندە سايران كولى قىسقا مەرزىمدە جاراقتالىپ، ادام تانىماستاي وزگەردى. بۇرىندارى مۇندا تۇرعىندار ءۇشىن شىعىس جاعالاۋى عانا قىزمەت كورسەتسە، ەندى كولدىڭ باتىس بەتىندە دە شومىلۋعا مۇمكىندىك جاسالدى.
بۇل ورىننىڭ ءتۇبىن قۇتقارۋشىلار باستان- اياق تازارتتى. جاعاجاي تۇرمىستىق قالدىقتاردان ارشىلىپ، قوقىستان ارىلدى. بورەنە، تەمىر- تەرسەك، بوتەلكە سىندى قاۋىپتى زاتتار سۇڭگۋىرلەردىڭ قىراعى كوزىنەن قالت كەتپەدى.
ەندى كول ماڭى تولىعىمەن اكىمدىك باقىلاۋىندا. مۇنداي ەسكەرتۋلەردى ەلەمەگەن ازاماتتار 20 دان باستاپ 40 ايلىق ەسەپتىك كورسەتكىشكە دەيىن ايىپپۇل ارقالايدى. قۇتقارۋشىلار مەن ءتارتىپ ساقشىلارى دا جۇمىسقا بىلەك سىبانا كىرىسكەن.
«قازىرگى تاڭدا اۋەزوۆ اۋدانى بويىنشا 5700 شارشى مەتر جاعاجاي جاسالدى. 50 كۇننەن قورعايتىن شاتىرلار ورناتىلدى. 80-گە جۋىق ورىندىقتار مەن قوقىس جاشىكتەرى ورناتىلدى. بالالار وينايتىن سپورت الاڭدارى قۇتقارۋشىلاردىڭ ورىندارى بەلگىلەنىپ بەرىلدى»، - دەدى اۋەزوۆ اۋدانى اكىمىنىڭ ورىنباسارى ارحات وماروۆ.
جوندەۋ جۇمىستارىنان وتكەن سايران كولىمەن قالا باسشىسى احمەتجان ەسىموۆ تە تانىسىپ قايتتى. بۇل جاعالاۋ تالاي جاننىڭ سۇيىكتى ورنىنا اينالارى ءسوزسىز. مۇنى جينالعان تۇرعىنداردىڭ قاراسىنان- اق بايقاۋعا بولادى. اسىرەسە، ولار جاعاجايدىڭ جاڭارتىلعان قازىرگى قالپىنا ءماز. بيىلعى شومىلۋ ماۋسىمىنىڭ ەرەكشەلىگىن شىعىس بەتكەيدەگى الماتىلىقتار دا اڭعاردى. مۇندا دەمالۋشىلار ءۇشىن كۇنقاعار، وتىراتىن ورىندار مەن قوقىس جاشىكتەرى ورناتىلدى.
«قازىرگى تاڭدا 2000 توننادان ارنايى قۇم توسەلدى. كوگالداندىرۋ جۇمىستارى جۇرگىزىلدى. اعاشتاردى سانيتارلىق كەسۋدەن وتكىزدىك»، - دەدى المالى اۋدانى اكىمىنىڭ ورىنباسارى ەرمەك بەيسەۋوۆ.
كەلەر جىلى كول جاعالاۋىنىڭ اۋماعى كەڭەيتىلمەك. الداعى ۋاقىتتا جاعاجاي اباي داڭعىلىنا دەيىن ۇزارتىلماقشى. ءقازىر ونىڭ جوباسى دايىندالۋدا. سونداي- اق كاسىپكەرلەر سپورت الاڭدارىنىڭ سانىن ۇلعايتىپ، بالالارعا ارناپ اتتراكتسيوندار ورناتپاق.
الماتى ت ۆ
