رۋمىنيا فۋتبول فەدەراتسياسىنىڭ پرەزيدەنتى: قازاقستان دا، رۋمىنيا دا قيىن توپتا ءجۇرىپ تاجىريبە جينايدى
وسىعان بايلانىستى رۋمىنيا فۋتبول فەدەراتسياسىنىڭ پرەزيدەنتى رازۆان بۋرليانۋ جەرەبەنىڭ قورىتىندىسى بويىنشا قازاقستان فۋتبول فەدەراتسياسىنىڭ باسپا ءسوز قىزمەتىنە پىكىرىن ءبىلدىردى.
«ءبىز ءۇشىن رەسەيدە وتەتىن الەم چەمپيوناتىنىڭ ىرىكتەۋ تۋرنيرى ماڭىزدى. ويتكەنى، الەم چەمپيوناتىنىڭ فينالدىق كەزەڭىنە قاتىسپاعانىمىزعا 2018-جىلى تۋرا 20 جىل تولادى»، - دەيدى رۋمىنيا فۋتبول فەدەراتسياسىنىڭ باسشىسى.
ونىڭ ايتۋىنشا، سول سەبەپتى رۋمىنيا ءۇشىن الەم چەمپيوناتىنا قاتىسۋ ۇلكەن جەتىستىك، ۇلتتىق ماقتانىش بولماق.
«ءار ماتچتا قۇرامامىز تاجىريبە جينايدى. 2016-جىلعى ەۋروپا چەمپيوناتىنىڭ ىرىكتەۋ تۋرنيرىندە پولشا فۋتبولشىلارى گەرمانيا قۇراماسىمەن ءبىرىنشى ورىندا كەلەدى. دانيا مەن پورتۋگاليا اراسىن تۋرنير كەستەسىندە نەبارى ەكى ۇپاي ءبولىپ تۇر. مەنىڭ پىكىرىم بويىنشا، پورتۋگاليا ەۋروپالىق فۋتبولدىڭ ەڭ مىقتى كۇشى سانالادى. چەرنوگوريا، ارمەنيا جانە قازاقستان قۇرامالارى دا جاقسى ويناپ ءجۇر. ءسىزدىڭ ەلدىڭ قۇراماسىمەن ءبىر توپقا تۇسكەنىمىزگە قۋانىشتىمىز. ويتكەنى، ەكى ەل اراسىندا ءوزارا قارىم-قاتىناس جاقسى قالىپتاسقان. قارىم-قاتىناستى فۋتبول ارقىلى دا نىعايتا تۇسۋگە بولادى»، دەدى ول.
«رۋمىنيا قۇراماسىنىڭ سوڭعى جىلدارداعى جەتىستىگىن قالاي تۇسىندىرە الاسىز؟» دەگەن سۇراققا فەدەراتسيا پرەزيدەنتى بىلاي دەپ جاۋاپ بەرەدى: «بۇل وڭاي جۇمىس بولعان جوق. ءتورت اي بۇرىن دامۋ جولىنىڭ ستراتەگيالىق جوسپارىن ازىرلەۋ قاجەت دەپ شەشتىك. ءبىزدىڭ ەلدە العاش رەت فۋتبول فەدەراتسياسى 2015-2020-جىلدارعا ارنالعان دامۋ ستراگەگياسىن قۇردى. ويتكەنى، رۋمىنيانىڭ 2020-جىلى ەۋروپا چەمپيوناتىنىڭ بىرنەشە ماتچىن قابىلداۋ مۇمكىندىگى بولادى. قازىرگى ۋاقىتتا ءبىزدىڭ قۇرامانىڭ باس باپكەرى مەن تەحنيكالىق قىزمەتكەرلەرى ۇزدىك سانالادى. سونىمەن قاتار، ۇلتتىق قۇرامانىڭ نامىسىن قورعايتىن جاقسى فۋتبولشىلاردىڭ ۋاقىتى كەلدى. وسىنىڭ ارقاسىندا ف ي ف ا رەيتينگىندە 42- ورىننان 8- ورىنعا كوتەرىلدىك. ءارى قاراي دا دامي تۇسەمىز دەپ ۇمىتتەنەمىز».
ەسكە سالا كەتەيىك، 2018-جىلعى الەم چەمپيوناتى ىرىكتەۋ تۋرنيرىندە قازاقستان قۇراماسى رۋمىنيا، پولشا، دانيا، چەرنوگوريا جانە ارمەنيا قۇرامالارىمەن ءبىر توپقا ءتۇستى.
اۆتور: قانات مامەتقازى ۇلى
