سۋديالار اقتاۋ ۇكىمدەرىن كوبىرەك شىعارۋدان قورىقپاۋ كەرەك - ق. ءمامي

 بايانداما بارىسىندا جوعارعى سوت ءتوراعاسى باس پروكۋراتۋرا تاراپىنان قولعا الىنىپ جاتقان قاماۋعا سانكسيا بەرۋ تۋرالى سوتتارعا تۇسەتىن وتىنىشتەر سانىن قىسقارتۋ تۋرالى باستاماعا قولداۋ ءبىلدىردى.

«قاداعالاۋشى ورگاننىڭ دەرەكتەرىنە سۇيەنسەك، جىل باسىنان بەرى قاماۋعا الۋلار سانى ءتورت ەسەگە ازايىپتى. بۇنىمەن قوسا، كەپىلدىك بەرۋدى قولدانۋ تاجىريبەسى كەڭەيىپ كەلەدى. ەكىنشى جاعىنان، ءبىرىنشى جارتىجىلدىقتا رەسپۋبليكا سوتتارى قاراعان قاماۋعا الۋ سانكسياسى تۋرالى 7 مىڭ 559 ءوتىنىشتىڭ 7 مىڭ 204 نەمەسە 95,7 پايىزى قاناعاتتاندىرىلدى. بۇل نەنى كورسەتەدى؟ قۋدالاۋشى ورگاندارى قاماۋعا الۋعا جاۋاپتىلىقپەن قاراي باستادى دەگەندى كورسەتە مە؟ بۇنداي جاعدايدا سوتتارعا قاماۋعا الۋعا سانكسيا بەرۋدەن باسقا جول دا قالىپ وتىرعان جوق قوي»، - دەدى قايرات ءمامي.

سونىمەن قاتار جوعارعى سوت ءتوراعاسى رەسپۋبليكا سۋديالارىنىڭ ىستەردى قاراۋ بارىسىندا ءالى كۇنگە دەيىن ايىپتاپ ۇكىم شىعارۋدان ارىلا الماي كەلە جاتقاندىعىنا نازار اۋداردى. ونىڭ سوزىنە قاراعاندا، سۋديالاردىڭ اقتاۋ ۇكىمدەرى 2,1 پايىزدى عانا قۇرايدى.

«ارينە، سۋديالارعا جاپپاي اقتاۋ ۇكىمدەرىن شىعارۋ كەرەك دەپ ەشكىم ايتپايدى. دەگەنمەن، ەسكەرتە كەتەتىن جايت، بىزگە جۇمىس ءتاسىلىن وزگەرتۋ كەرەك. اقتاۋ ۇكىمدەرىنە شەكتەن شىعاتىنداي قورقىنىشپەن قاراۋدىڭ قاجەتى شامالى. ونىڭ ۇستىنە ءبىزدىڭ زاڭنامادا قازىرگى كۇنى قوسىمشا تەرگەۋگە جىبەرۋ دەگەن ۇعىم جوق. سۋديا سوڭعى شەشىمدى شىعارۋى كەرەك. سونىمەن قاتار اقتاۋ ۇكىمدەرى دامىعان شەت ەلدەردىڭ كۇندەلىكتى قولداناتىن تاجىريبەسى جانە ءبىز دە حالىقارالىق ستاندارتتارعا سايكەس بولۋىمىز كەرەك»، - دەدى ق. ءمامي.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى