مەملەكەتتىك تىلدە ەڭ ۇزدىك سوت وتىرىستارىن وتكىزگەن سۋديالار ماراپاتتالدى - جوعارعى سوت

«ايتا كەتەرلىگى، بۇعان دەيىن وبلىستىق جانە تەڭەستىرىلگەن سوتتار اراسىندا «مەملەكەتتىك تىلدەگى ۇزدىك سوت وتىرىسى» بويىنشا رەسپۋبليكالىق بايقاۋ ءوتتى. ەكىنشىدەن، رەسپۋبليكا سوتتارىندا وقۋ باعدارلامالارىن ۇزدىك ۇيلەستىرە بىلگەن، سونداي- اق تاتۋلاستىرۋ، ياعني مەدياتسيا ءراسىمىن كەڭىنەن قولدانعان سۋديالاردى ماراپاتتاۋ تۋرالى شەشىم قابىلدانعان بولاتىن»، - دەدى ق ر جوعارعى سوت ءتوراعاسى قايرات ءمامي ماراپاتتاۋ ءراسىمىن جاريالاي وتىرىپ.

 بايقاۋ ناتيجەسىندە «مەملەكەتتىك تىلدەگى ەڭ ۇزدىك سوت وتىرىسى» بايقاۋىندا ءبىرىنشى ورىندى سولتۇستىك قازاقستان وبلىسى مامانداندىرىلعان اۋدانارالىق ەكونوميكالىق سوتى يە بولدى. ەكىنشى ورىندى اكىشمىلىك ءىستى قاراۋدا جان- جاقتى ازىرلىگى جانە ساۋاتتى جۇرگىزگەنى ءۇشىن پاۆلودار وبلىسى پاۆلودار اۋداندىق سوتى يە بولدى. ال ءۇشىنشى ورىندى  قىزىلوردا وبلىستىق سوتىنىڭ اپەللياتسيالىق القاسى مەن ماڭعىستاۋ وبلىستىق سوتىنىڭ كاسساتسيالىق القاسى الدى.

بۇدان بولەك، مەدياتسيا، ياعني تاراپتاردى تاتۋلاستىرۋ بويىنشا نەعۇرلىم كوپ ءىس قاراعان سۋديالار دا ماراپاتتالدى.

جوعارى سوت ءتوراعاسى ماراپاتتاردى تابىستاي وتىرىپ، سۋديالاردىڭ الداعى جۇمىسىنا ساتتىلىك تىلەدى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى