قارجى مينيسترلىگى جاريا ەتىلەتىن اقشا قاراجاتتارىن بانكتە ساقتاۋ تۋرالى تالاپتى الىپ تاستاۋدى ۇسىندى
بۇل تۋرالى بۇگىن ورتالىق كوممۋنيكاتسيالار قىزمەتىندەگى اقشالاي قاراجات پەن مۇلىكتى زاڭداستىرۋدى جەڭىلدەتۋ تاقىرىبىنداعى بريفينگ بارىسىندا قارجى ۆيتسە-ءمينيسترى ارداق تەڭگەبايەۆ ءمالىم ەتتى.
«جاريا ەتۋ اكسياسىن مەيلىنشە جەڭىلدەتۋ جاعىنا قايتا قاراۋ، سونىمەن بىرگە قۇقىق قورعاۋ ورگاندارى تاراپىنان زاڭسىز قۋدالاۋدان كەپىلدىكتەردى قامتاماسىز ەتۋ تۋرالى ەلباسى تاپسىرما جۇكتەگەن بولاتىن. وسىعان وراي، قارجى مينيسترلىگى ءتيىستى جاڭا زاڭ جوباسىن ازىرلەپ وتىر»، - دەدى ارداق تەڭگەبايەۆ.
ونىڭ ايتۋىنشا، جاڭا زاڭ جوباسى اياسىندا اقشانى جاريا ەتۋ بويىنشا ءۇش وپتسيا ۇسىنىلىپ وتىر.
«بۇل بىرىنشىدەن، اقشانى ساقتاۋ بويىنشا مىندەتتەمە الماستان الىم تولەمەستەن، ءوز قالاۋىنشا شەكتەۋسىز بيلىك ەتە وتىرىپ، بانكتەگى شوتتارعا سالۋ جولىمەن جاريا ەتۋ ۇسىنىلادى. قازىرگى تاڭدا زاڭنامامىزدا جاريا ەتىلەتىن قاراجاتتى بەس جىلعا دەيىن بانكتە ساقتاۋ تالاپ ەتىلەتىن نورما بار بولاتىن. ءبىز وسىنى الىپ تاستاۋدى ۇسىنامىز»، - دەدى ا. تەڭگەبايەۆ.
اۆتور: قانات مامەتقازى ۇلى
