ادال جار - وقيعا
ونىڭ اتى سەزىم. وتىزعا ەندى عانا جەتكەن جاس ايەل دارىگەرلەردىڭ قاتەلىگىنەن بولىپ ەكى كوزىنەن بىردەي ايىرىلسا دا كۇندە ەرتەمەن ايالدامالاردىڭ بىرىنەن قالاعا قاتىنايتىن اۆتوبۋستارعا ءوزى ءمىنىپ قىزمەتىنە بارىپ- كەلىپ جۇرەدى.
ونىڭ ەكى كوزى سۋ قاراڭعى بولعان العاشقى كەزدەردە بۇل الەمدەگى سەنەرى مەن سۇيەنەرى ءبىر اللادان كەيىن كۇيەۋى عانا بولدى. كۇيەۋى اسكەري ادام. باعىنا قاراي جولداسى جاندوس يماندى، تازا جان ەدى.
ايەلىنىڭ ەكى كوزى زاعيپ بولىپ قالعاندا ىشىنەن قان جىلاپ تۇرسا دا، ايەلىنىڭ الداعى ۋاقىتتاردا ءوز باسىن الىپ جۇرۋىنە، ادام رەتىندە ەشكىمگە جانە ەشنارسەگە تاۋەلدى بولماي ءومىر سۇرۋىنە بارىنشا قولداۋ كورسەتۋىم قاجەت دەپ شەشىپتى.
سەزىم دە قاپ-قاراڭعى بولعان جاڭا ومىرىنە كۇن وتكەن سايىن ازداپ- ازداپ ۇيرەنە باستايدى. ۇيدە وتىرعان كەزىندە جەڭىل- جەلپى ءۇي شارۋالارىن اقىرىنداپ ىستەپ ۇيرەنەدى. تىپتەن ەكى كوزى كورمەي قالۋى سونشالىقتى اۋىر ەمەستەي سەزىلەتىن كەزدەرى دە بولىپتى. جاندوستىڭ قامقورلىعى دا بارىنشا ارتادى. باستارىنا كۇن تۋعان وسى ساتتەردە ولاردىڭ ءوزارا سىيلاستىعى مەن ءبىر- بىرىنە دەگەن سۇيىسپەنشىلىگى دە ارتا تۇسكەن بولاتىن.
كۇن ارتىنان كۇن ءوتىپ سەزىمنىڭ ەم الاتىن مەرزىمى دە اياقتالىپ ءوز جۇمىسىنا قايتا كىرەتىن ۋاقىتى دا جەتىپتى. دەنى ساۋ كەزدە ءۇي مەن جۇمىس اراسى الىس بولسا دا اۆتوبۋسپەن ەمىن- ەركىن جۇرە بەرەتىن سەزىم ءۇشىن قازىرگى سۋ قاراڭعى بولعان كەزىندە جۇمىسىنا بارىپ- كەلۋ البەتتە، قيامەت- قايىممەن بىردەي.
سوندىقتان دا باستاپقى كەزدە جاندوس تاكسي جالداپ ايەلىن جۇمىسىنا قويىپ جەتكىزدىرىپ، الدىرىپ تۇردى جانە ءوزى ۇنەمى بىرگە ەرتىپ اپارىپ، كەلەر ساعاتىندا توسىپ الاتىن. سوندىقتان سەزىمنىڭ كوڭىلى ورنىقتى بولدى.
ءبىراق وسىلايشا ۇنەمى استى- ۇستىنە ءتۇسىپ، قورعاپ- قولپاشتاۋ ەشبىر ناتيجە بەرمەيدى، ءارى باسقالارعا تاۋەلدىلىگى ارتا بەرەدى دەگەن وي جاندوستىڭ كوڭىلىنە كەلەدى دە ءبىر كەشتە ايەلىنە وسى ويىن ايتقاندا سەزىم: «نەمەنە؟ ...سەن نە ايتىپ تۇرسىڭ، مەن كورمەيتىن سوقىر ادام ەمەسپىن بە، قايدا بارا جاتقانىمدى قالاي اجىراتپاقپىن؟.. ۇزاماي سەن مەنى تاستاپ كەتەتىن شىعارسىڭ، مەن سوندا قالايشا ءتىرى جۇرەمىن؟..»، - دەپ ەڭىرەپ بۇلقان- تالقان بولعاندا «شىن جىلاسا سوقىر كوزدەن جاس شىعاتىنىنىڭ» كەرىن كەلتىرىپ ەدى.
ايەلىنىڭ وسىلاي كۇيىنگەنىنە جاندوستىڭ جانى شىعاردا بولەك بولعاندىقتان «مەن سەنى ءوزىڭ جۇمىسىڭا بارىپ- كەلىپ ۇيرەنگەنىڭشە اۆتوبۋسپەن بىرگە جۇرەتىن بولامىن» دەپ كەلىسەدى. وسىلايشا 2 اپتا بويى جاندوس اسكەري كيىمىن كيىپ الىپ ايەلىمەن بىرگە ونى جۇمىسىنا جەتكىزىپ سالىپ ءجۇردى. وسى 2 اپتا ۋاقىتتا ولار كورۋدەن باسقا سەزىم مۇشەلەرى ارقىلى ماڭايىنداعى زاتتاردى قالاي اجىراتۋ، قانداي نارسەلەردەن ساقتانىپ ءجۇرۋ تۋرالى ءبىرشاما تاجىريبەلەر جاساپ ۇيرەنەدى. سونىمەن قاتار سەزىمنىڭ جۇمىسىنا بارار باعىتتاعى اۆتوبۋس شوفەرلەرىمەن دە تانىسىپ، سەزىمگە ۇنەمى ءبىر بوس ورىن ساقتاپ قويۋدى تاپسىرىپتى.
البەتتە، ادامدار وزدەرى تالاپتانىپ ارەكەت ەتسە قانداي دا قيىنشىلىقتى جەڭەتىنى بەلگىلى. سونىمەن كۇندەردىڭ ءبىر كۇنى سەزىم ەرتە تۇرىپ، جۇمىسىنا جالعىز ءوزى بارا باستايدى. العاشقى كەزدەرى وعان جالعىز ءجۇرۋ وتە قيىن بولسا دا كۇن وتكەن سايىن جەڭىلدەپ، ءجۇرىس- تۇرىسى ەركىندەپ قالىپتى ادەتتەرگە توسەلىپ ۇيرەنىپ كەتەدى. سونىمەن نە كەرەك، ءۇش اي بويى وسىلايشا جالعىز ءوزى جۇمىسىنا بارىپ كەلىپ ءجۇردى.
ءبىر كۇنى ادەتتەگىدەي جۇمىسىنا بارۋ ءۇشىن اۆتوبۋسقا وتىرىپ جاتقانىندا اۆتوبۋس شوپىرى وعان: «ءسىز وتە باقىتتى ادام ەكەنسىز!» دەدى. «سوقىر ادام قالايشا باقىتتى بولماق؟» دەپ جاۋاپ قاتقانىندا شوپىر: « مەن ۇنەمى بايقاپ جۇرەمىن. كۇن سايىن ءسىز اۆتوبۋسقا وتىرعالى كەلگەنىڭىزدە اسكەري كيىمى بار ادەمى ەركەك سوڭىڭىزدان ەرە كەلەدى دە ءسىز اۆتوبۋستان ءتۇسىپ كوشە بويىمەن جۇمىسىڭىزعا جەتكەنشە سىرتىڭىزدان قاراۋىلداپ، جۇمىس ورنىڭىزعا كىرگەن كەزدە سىزگە الىستان قول بۇلعاپ، ءسۇيۋ يشاراسىن جاسايدى دا بۇرىلىپ كەتەدى. وتىرىك ايتسام جەر جۇتسىن، ونىڭ وسىلاي جۇرگەنىنە 3 اي ۋاقىت بولدى» دەپتى.
شوپىر وسىلاي دەگەندە سەزىمنىڭ كوزىنە قۋانىش جاسى مولتىلدەدى. ويتكەنى ول ايەل باقىتتى ەدى، اللا تاعالا ونىڭ كورەتىن كوزىن السا دا وعان كوڭىل كوزى اشىق ومىرلىك ادال جاردى ءناسىپ ەتكەن بولاتىن...
امانتاي تويشىباي ۇلى
