قازاققا جات ءداستۇرلى ەمەس ءدىني اعىمدار تۋرالى كىتاپ جارىققا شىقتى
بۇل تۋرالى بۇگىن شىمكەنتتەگى «وڭتۇستىك» اقپارات ورتالىعىندا وتكەن بريفينگتە وبلىستىق ىشكى ساياسات جانە ءدىن ىستەرى باسقارماسىنا قاراستى «الەۋمەتتىك باستامالار ورتالىعى» مەكەمەسىنىڭ ديرەكتورى نۇرجان تۇرسىنباي مالىمدەدى، دەپ حابارلايدى Bnews.kz ءتىلشىسى.
ونىڭ ايتۋىنشا، ورازا ايت مەرەكەسىنە وراي ءۇش ءدىني ادەبيەت پەن بىرنەشە ادىستەمەلىك قۇرال جارىققا شىقتى.
بۇل كىتاپتاردىڭ ءبىرى - «ەلىمىزدە تىيىم سالىنعان جانە ءداستۇرلى ەمەس ءدىني اعىمدار». مۇندا كەرەعار ءدىني اعىمداردىڭ پايدا بولۋ سەبەپتەرى ءدىني، ساياسي، الەۋمەتتىك تۇرعىدان تالقىلانىپ، قازاقستانداعى سەكتا، كەرەعار ءدىني اعىمداردىڭ ورىن الۋى، ولاردىڭ مەملەكەت قاۋىپسىزدىگىن، قوعام تىنىشتىعىن بۇزۋ ارەكەتتەرىنىڭ كورىنىستەرى مەن ءادىس- تاسىلدەرىنىڭ ەرەكشەلىكتەرى ءدىنتانۋشىلىق تۇرعىدان جان- جاقتى قاراستىرىلعان.
«ورتالىققا جۇكتەلگەن نەگىزگى مىندەت - ءدىننىڭ شىنايى قاعيداتتارىن حالىق اراسىندا ءتۇسىندىرۋ، ءدىن اتىن جامىلعان تەرىس پيعىلدى ۇيىمداردىڭ ارەكەتىنەن ساقتاۋ، ادامزات بالاسىنا ورتاق رۋحاني دۇنيەتانىم قالىپتاستىرۋ بولىپ تابىلادى. ورتالىقتىڭ باستاماسىمەن جارىق كورىپ وتىرعان وسى ادەبيەتتەر مەن ادىستەمەلىك قۇرالدار قوعامنىڭ ءدىني ساۋاتتىلىعىن كوتەرۋگە باعىتتالىپ، وبلىس كىتاپحانالارى مەن مەشىتتەرىنە، وقۋ ورىندارىنا تەگىن تاراتاتىن بولادى»، - دەدى نۇرجان تۇرسىنباي.
بريفينگتە الداعى ۋاقىتتا اتالمىش ورتالىقتىڭ مۇنداي تاقىرىپتارعا ارنالعان ادەبيەتتەردى تۇراقتى جاريالايتىنى ايتىلدى.
