بۇگىن الماتىدا «قارا جولبارىس» پەن «سۇڭقار» ايقاسادى
ەندى وسى كەزدەسۋدىڭ ناقتى قاي كۇنى جانە قاي جەردە وتەتىنى بەلگىلى بولدى.
قازاقستاندىق كورەرمەندەردىڭ بۇل باسەكەنى تاعاتسىزدانا كۇتۋى بەكەر ەمەس. سەبەبى، «قارا جولبارىس» دەگەن لاقاپ اتپەن تانىمال 29 جاستاعى رەسەيدىڭ اتاقتى سپورتشىسى 2013 -2014-جىلدار ارالىعىندا الاش توپىراعىنا ەكى مارتە ات باسىن بۇرعان بولاتىن. ەكى رەتىندە دە ول ەرجان ەستانوۆتى جەڭىپ، جەرگىلىكتى جانكۇيەرلەردىڭ كوڭىلىن قۇلازىتتى. سول ساتتەردە سوناۋ كەڭ بايتاق قازاق جەرىندە راسۋل ميرزايەۆتى جەڭە الاتىن بىردە-ءبىر ورەننىڭ تابىلماعانىنا كۇيىندىك.
جوعارىداعى جاعداي قازاقستاندا ءبىرقاتار ءدۇبىرلى دودالاردىڭ وتۋىنە مۇرىندىق بولعان «الاش-پرايد» كلۋبىنىڭ پرەزيدەنتى دانيار قاسقاراۋوۆتىڭ دا قىتىعىنا تيسە كەرەك، ول ۇستىمىزدەگى جىلدى تاعى ءبىر بايراقتى باسەكە ۇيىمداستىرۋدى ءجون كوردى. اتاپ ايتساق، 17- قازاندا الماتىداعى بالۋان شولاق اتىنداعى سپورت سارايىندا ەرەجەسىز جەكپە-جەكتەن ءىرى حالىقارالىق تۋرنير وتەدى. قازاق حاندىعىنىڭ 550 جىلدىعىنا ارنالعان جارىستا الىس-جاقىن شەت مەملەكەتتەردەن جينالعان ساقا سپورتشىلار الاشتىڭ جۇرەگىنىڭ تۇگى بار ازاماتتارىمەن ايقاسادى. ال سول كەشتىڭ باستى باسەكەسىندە راسۋل ميرزايەۆ پەن ارمان وسپانوۆ جۇدىرىقتاسادى.
راسۋلدىڭ قانداي قايراتتى سپورتشى ەكەنىن ءبىز گازەت بەتىندە تالاي رەت جازعانبىز. ەندى وعان توقتالۋدىڭ قاجەتى جوق دەپ ويلايمىز. ال ارمان جايلى ايتار بولساق، ونىڭ دا العان اسۋلارى از ەمەس. 25 جاستاعى وڭتۇستىك قازاقستان وبلىسىنىڭ تۋماسى كۇرەستىڭ بىرنەشە ءتۇرىن ەركىن مەڭگەرگەن. ول جاۋىنگەرلىك سامبودان 68 كەلى سالماق دارەجەسى بويىنشا، الەمنىڭ ەكى دۇركىن چەمپيونى، ەرەجەسىز جەكپە-جەكتەن دە ءبىرقاتار حالىقارالىق جارىستاردىڭ جەڭىمپازى.
وسپانوۆ قولمەن دە قاتتى ۇرادى، اياقپەن دە جاقسى تەبەدى جانە بالۋاندىق ونەردى دە جەتىك مەڭگەرگەن. ءبىر سوزبەن ايتساق، ول ناعىز امبەباپ سپورتشى. ارماننىڭ بۇركەنشىك ەسىمى - «سۇڭقار». سونداي-اق سول كەشتە ءبىز اسلان توقتاربايەۆ، ەرجان ەستانوۆ، ەرمەك تىلاۋوۆ، ماحير مامەدوۆ، ەۆگەني ەگەمبەرديەۆ، ەرلان تىلەۋىمبەتوۆ جانە تاعى باسقا ەلىمىزدىڭ ەڭ ۇزدىك جەكپە-جەك شەبەرلەرىنىڭ ونەرىن تاماشالايمىز.
عالىم سۇلەيمەن
«ايقىن»
