ۆولەيبولدان قازاقستان چەمپيوناتىندا قىزىلوردالىقتار كۇمىس جۇلدەنى يەلەندى - فوتو
ەلىمىزدىڭ بارلىق وبلىستارىنان 18 كوماندا، 250 گە جۋىق سپورتشى قاتىسقان ءدۇبىرلى سايىستا قىزىلوردالىقتار كۇمىس جۇلدەنى ەنشىلەدى. ءبىرىنشى ورىندا - شىعىس قازاقستان، ءۇشىنشى ورىندا - استانا قالاسى. ال پاۆلودار وبلىسىنىڭ كومانداسى ءتورتىنشى ورىندى قاناعات تۇتتى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.
كوماندانىڭ العا شىعۋىنا شيەلىلىكتەر راسۋل ەگەنوۆ، ايات رامازان ۇلى، ەلجاس ساپارباي، جاڭاقورعان اۋدانى، تۇگىسكەن ەلدى مەكەنىنەن بولاتحان شانجارحان، ەركەبۇلان سەيدان، نۇرلىبەك ىبىراي ۇلى، ارالدىق جاندوس شامارانوۆ، سىرداريالىق سپورتشىلار ازامات وردابەكوۆ، داۋلەت كەنجەعالييەۆ، اسقار بالتاباي، نۇرعيسا وتەگەنوۆ، داۋلەت رۋسلانوۆ، جاڭاقورعاندىق راحات سەرجان سىندى ۆولەيبولشىلار ءوز ۇلەستەرىن قوستى.
سونداي- اق، چەمپيوناتتا «ۇزدىك ويىنشى» نوميناتسياسىمەن شيەلىلىك ايات رامازان ۇلى ماراپاتتالدى.
قىزىلوردا وبلىسىنىڭ قۇراما كومانداسىن جارىسقا بولات رىسماحان، وتەپبەرگەن ءابدىرامانوۆ، باتىر بابايەۆ، جاسۇلان بەردىبايەۆتار دايىندادى.
جاسوسپىرىمدەر اراسىندا وبلىستىڭ اعا جاتتىقتىرۋشىسى بولات رىسماحاننىڭ ايتۋىنشا، سپورتشىلار ەندى قاراشا ايىندا پاۆلودار قالاسىندا بولاتىن ق ر چەمپيوناتىنا دايىندالادى.
