قازاقستاندىق اسكەري قىزمەتشىلەر اباي شىڭىن باعىندىردى - فوتو
بيىكتىگى 4010 مەترلىك تاۋ شىڭىن باعىندىرعان اسكەري قىزمەتشىلەر بۇل جەڭىسىن قازاقتىڭ ۇلى اقىنى، دانا ويشىل، فيلوسوف اباي قۇنانباي ۇلىنىڭ 170 جىلدىعىنا ارنادى.
ءبىرىنشى باعىندىرعان شىڭ 2880 مەتر بيىكتىكتە ورنالاسقان ىلە الاتاۋى بوكتەرىندەگى اسۋدىڭ ءبىرى بولاتىن. اسكەري قىزمەتشىلەر وسى جەرگە تۇنەپ، تاڭەرتەڭ قايتا جولعا شىقتى. ناتيجەسىندە اباي شىڭىنا اسكەري الپينيستەر جەتى ساعاتتا (قونعان ۋاقىتتى ەسەپكە الماعاندا) جەتتى.
اسكەري قىزمەتشىلەردىڭ ايتۋىنشا، اۋا- رايى ولاردىڭ تاۋداعى جورىعىنا قولايلى جاعداي جاسادى، ال تۇنگى جاۋعان جاۋىن جەكە قۇرامنىڭ جاۋىنگەرلىك رۋحىن شىڭدادى.
قازاقستاننىڭ ايرو ۇتقىر اسكەرلەرىنە قاراستى اسكەري قىزمەتشىلەر ءۇشىن تاۋ دايارلىعى جاۋىنگەرلىك دايارلىقتىڭ اجىراماس بولىگى بولىپ سانالاتىنىن اتاپ وتكەن ءجون. تەوريالىق جانە پراكتيكالىق ساباقتاردىڭ ارقاسىندا جاۋىنگەرلەر الپينيست رەتىندە ءوز شەبەرلىكتەرىن جەتىلدىرۋگە، ەڭ كۇردەلى دەگەن تاۋ باعىتتارىن يگەرۋگە، جاڭا شىڭداردى باعىندىرۋعا مۇمكىندىك الادى.
تاۋ دايارلىعى ەكى باعىتقا بولىنەدى. ءبىرىنشى - ارنايى الپينيستىك دايارلىق. بۇل جەردە اسكەري قىزمەتشىلەر تاۋ شاتقالدارىنىڭ بارلىق تۇرلەرىن يگەرۋگە ارنالعان تەحنيكالاردى مەڭگەرەدى، شىڭعا ورمەلەيدى، تاۋ شاڭعىسى مەن قار كوشكىنىنە دايارلىق كۋرسىنان وتەدى، تاۋلى ايماقتاردا ءومىر ءسۇرۋ ماشىقتارىن ۇيرەنەدى. ەكىنشى باعىت - تاۋدا اسكەري ءىس- قيمىلدى جۇرگىزۋ دايارلىعى.
ەسكە سالا كەتسەك، اباي شىڭى - كىشى الماتىنىڭ باتىس شوقىلارىندا ىلە الاتاۋ سىلەمدەرىنىڭ جوتاسىندا ورنالاسقان. بۇل قازاقستانداعى كوركەم جانە بيىك تاۋ شىڭدارىنىڭ ءبىرى.
