قازاقستاندا وليمپيادا ويىندارىنا قاتىسۋ ءۇشىن ايەلدەر ۆەلو سپورتىنان ۇلتتىق شتاتتىق كوماندا قۇرىلادى

ق ر مەملەكەتتىك حاتشىسى گۇلشارا ءابدىقالىقوۆا مەن مادەنيەت جانە سپورت ءمينيسترى ارىستانبەك مۇحامەدي ۇلىمەن كەزدەسكەن قازاقستان ۆەلوسپورت فەدەراتسياسىنىڭ ۆيتسە- پرەزيدەنتى، وليمپيادا چەمپيونى ءزۇلفيا زابيروۆا وسىنداي ۇسىنىس جاسادى.

 قازاقستان ۆەلو سپورت فەدەراتسياسىنىڭ ۆيتسە- پرەزيدەنتى ءارى «Astana Acca Due O» ايەلدەر ۆەلوسيپەد كومانداسىنىڭ سپورتتىق ديرەكتورى كەزدەسۋ بارىسىندا وتاندىق ايەلدەر ۆەلوسپورتىنىڭ قازىرگى جاي- كۇيى جايىندا بايانداپ، بۇل سالانى دامىتۋ باعىتىنداعى فەدەراتسيانىڭ جوسپارلارىمەن ءبولىستى.

«ءزۇلفيا زابيروۆا ايەلدەر ۆەلوسپورتىنان وڭىرلىك جانە ۇلتتىق شتاتتىق كوماندا قۇرۋ قاجەتتىگىن اتاپ ءوتتى. ول وتاندىق سپورتشىلاردى ىرىكتەۋگە جانە ولاردىڭ سپورتتىق شەبەرلىگىن ارتتىرا تۇسۋگە مۇمكىندىك بەرەدى. كەلەسى جىلى فەدەراتسيا وتاندىق شاباندوزداردان تۇراتىن وڭىرلىك كوماندا قۇرادى. ايتا كەتەرلىگى، اتالعان كوماندا جوعارى دەڭگەيدەگى حالىقارالىق جارىستارعا قاتىسىپ، وليمپيادا ليتسەنزيالارىن ۇتىپ الۋ مۇمكىندىگىنە يە بولادى. سوندىقتان وڭىرلىك ۆەلوكوماندا مەن ۇلتتىق شتاتتىق كوماندا ديرەكتسياسى بازاسىندا كوماندا قۇرۋ ەلىمىزدە ايەلدەر اراسىنداعى ۆەلوسپورتتىڭ دامۋىنا تىڭ سەرپىن بەرەدى»، - دەلىنگەن فەدەراتسيا اقپاراتىندا.

گ. ءابدىقالىقوۆا ءوز كەزەگىندە قازاقستاندا سپورتتى دامىتۋ ماڭىزدى ەكەندىگىن اتاپ ءوتىپ، ءوز تارابىنان ەلىمىزدەگى ايەلدەر ۆەلوسپورتىن قولداۋعا دايىن ەكەندىگىن ءبىلدىردى. ا. مۇحامەدي ۇلى ءوز كەزەگىندە فەدەراتسيا باستاماسىنا قولداۋ ءبىلدىردى. ونىڭ اتاپ وتۋىنشە، ايەلدەر ۆەلوسپورتىن دامىتۋدى ەلىمىزدىڭ وڭىرلەرىنەن باستاعان ءجون.

 كەزدەسۋ سوڭىندا ز. زابيروۆا مەملەكەتتىك حاتشىنى اعىمداعى جىلدىڭ تامىز ايىندا جاسوسپىرىمدەر اراسىندا وتەتىن ترەكتەگى ۆەلوسپورت بويىنشا UCI الەم چەمپيوناتىن تاماشالاۋعا شاقىردى.

 ايتا كەتەيىك، «Astana Acca Due O» ايەلدەر ۆەلوسيپەد كومانداسى 2014 - جىلى قۇرىلدى. ونىڭ ساپىندا ەلىمىزدەگى ەڭ ۇزدىك 7 سپورتشى بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى