تالدىقورعاندا ەلباسىنىڭ «اقىل-پاراسات كىتابى» اتتى جيناعى تانىستىرىلدى
كورنەكتى جازۋشى روللان سەيسەنبايەۆ جەتەكشىلىك ەتەتىن ۇجىم وقىرمانعا 200 تومدىق كىتاپحانا ۇسىنۋدى ماقسات ەتىپ وتىر. وعان الەمدىك ادەبيەتتىڭ ءىنجۋ-مارجاندارىنا اينالعان شىعارمالار كىرەدى.
جەتىسۋ سەرياسى بويىنشا دايىندالعان 8 كىتاپ بۇدان 2 جىل بۇرىن وقىرمان قولىنا تيگەن بولاتىن. ولار ءسۇيىنباي ارون ۇلى، جامبىل جابايەۆ، مۇقاعالي ماقاتايەۆ، سايىن مۇراتبەكوۆ سياقتى بەلگىلى تۇلعالارعا ارنالعان.
ال جاڭا تۋىندى ەلباسىنىڭ ەڭبەكتەرىنەن قۇرالعان. وندا نۇرسۇلتان ءابىش ۇلىنىڭ وتاندى ءسۇيۋ، جەر تاعدىرى، حالىق، تاۋەلسىزدىك، مەملەكەت، تۇراقتىلىق، ۇلتتىق سانا مەن نامىس، ءتىل، ەل بىرلىگى، دەموكراتيا جانە ورەلى رۋح جايىنداعى وي-تولعامدارى بار. كىتاپتىڭ تۇساۋكەسەر ءراسىمى تالدىقورعانداعى ءتىل سارايىندا ءوتتى. وعان قوعامدىق ۇيىمدار مەن زيالى قاۋىم وكىلدەرى قاتىستى.
«كىتاپ 15 تاراۋدان تۇرادى. ءاربىر تاراۋىندا قازاقستاننىڭ وتكەن تاريحىنىڭ بەلەس-بەلەستەرى جاقسى ايتىلعان. بۇل - جاستارعا ارنالعان كىتاپ. ءبىزدىڭ كەلەشەگىمىزگە ارنالعان كىتاپ. بۇل كىتاپتىڭ ماڭىزى وتە زور»، - دەدى فيلوسوفيا عىلىمدارىنىڭ دوكتورى امانجول قاسابەكوۆ تانىستىرىلىمدا سويلەگەن سوزىندە.
الماتى وبلىسىنىڭ قۇرمەتتى ازاماتى گۇلجيان سۇلەيمەنوۆانىڭ ايتۋىنشا، ەلباسىنىڭ حالقىنا، ەلىنە ىستەپ جاتقان ەڭبەگىنىڭ ءبارى وسى كىتاپتا ايقىندالىپ، ايشىقتالىپ كورىنىپ تۇر. «سوندىقتان بۇل كىتاپ ءاربىر قازاقستان ازاماتىنىڭ ۇستەلىنىڭ ۇستىندە تۇرادى دەپ ويلايمىن»، - دەدى ول.
